அனைத்து உயிர்களுக்குமான பொங்கல் விழா

மதுரச்சோறு

சிதம்பரம் சுவாமிகள் திருப்போரூர் சந்நிதி முறையைச் சேர்ந்த ஒரு சைவ மகான். அவர் நாம் தை முதல் தேதி மட்டுமல்லாமல் தினமும் பொங்கல் படைக்க வேண்டும் என்கிறார். அதுவும் எப்படி?

பொங்கல் செய்பவர் மூன்று கற்களை அடுக்கி அடுப்பாக்குவர். அன்பு, பொறுமை, ஆசையின்மை ஆகிய மூன்று நற்பண்புகளைக் கொண்டு அடுப்பு செய்ய வேண்டும் என்கிறார் சுவாமிகள். அடியவரது நற்பண்புகள் அடுப்பாகிவிட்டன. 

அடுப்பு மட்டும் போதுமா? விறகு, அக்னி, பானை வேண்டுமே. விறகு நம்மிடம் உள்ள ஆணவம், கன்மம், மாயை ஆகிய மும்மலங்கள். விறகைப் பற்ற வைக்க நெருப்புக்கு என்ன செய்வது? ஞானமே அக்னி. ஞானாக்னி தோன்றியதும் மாயை, கன்மம், ஆணவம் ஆகியவை எரிந்துவிடும்.

ஆன்மா - உயிர் என்ற பானையை அடுப்பில் வைத்து அதனுள் நமது நல்லது, கெட்டது அனைத்தையும் இடச் சொல்கிறார்.

இப்படிச் சமைக்கும்போது நம் மனம் பக்குவப்பட்டுவிடும். சமைத்தல் என்றாலே பக்குவப்படுத்துதல் என்று பொருள். பொங்கல் ருசியுடனிருக்க வெல்லம், சர்க்கரை ஆகியவை இடாது கருப்பஞ்சாறு இடுவது வழக்கம். இறையருள்தான் கருப்பஞ்சாறு. இது சேர்ந்ததும் கிடைப்பது மதுரச்சோறு. 

பக்குவப்பட்ட நம் குணங்களில் நிலைத்து நின்று இறையருள் கூடும்போது கிடைப்பது பிரம்மானந்தம். அதுவே மதுரச்சோறு என்கிறார் சுவாமிகள். ஆக இப்படி நம்மை நாம் நன்கு சமைத்துக் கொண்டு பிரம்மானந்தம் பெற வேண்டுமென்பதே தைப் பொங்கலின் ஆன்மிகத் தாத்பர்யம்.

விலங்குகளுக்கு நன்றி கூறும் மாட்டுப்பொங்கல்:

விலங்குகளில் முக்கியமான பசுவிற்குப் பூஜை செய்வதன் மூலம் அனைத்து விலங்குகளுக்கும் நன்றி கூறும் தினம். விலங்குகள் கீழானவை என்று நினைக்கிறோம். ஆயினும் அவை நம்மைவிட வாய்ப்புகள் குறைந்தவையே, கீழானவை அல்ல.

இந்தோனேஷியாவில் புத்த பிக்ஷுக்களால் வளர்க்கப்படும் புலிகள் அவர்களைத் தங்கள் மீது ஏற அனுமதிக்கின்றன. அவர்களின் கட்டளைக்குக் கீழ்ப்படிகின்றன. நாம் அதிகமான அன்பை வெளிப்படுத்தும்போது, விலங்கும் அன்பை வெளிப்படுத்துகிறது. கொடிய விலங்குகளே இப்படியென்றால் சாதுவான மிருகங்கள் எப்படிப் பழகும்!

பசுவின் உடலில் முப்பத்து முக்கோடி தேவர்களும் வசிப்பதாக ஐதீகம். முற்காலத்தில் அதிதி பூஜை மிக முக்கியமாகக் கடைப்பிடிக்கப்பட்டது. தினமும் வீட்டில் பூஜை முடிந்து சாப்பிடுமுன் வெளியே சென்று அன்றைய அதிதிக்காகக் காத்திருக்கக் கூறுகிறது சாஸ்திரம். எவ்வளவு நேரம் அப்படிக் காத்திருக்க வேண்டும்? 

மடி நிறைந்த பசுவினைக் கறக்க ஆகும் நேரம் வரை, விருந்தாளிக்காகக் காத்திருக்க வேண்டும். இதன்மூலம் நம் முன்னோரின் ஒவ்வொரு வீட்டிலும் பசு இருந்தது, அவற்றை அவர்கள் மிகவும் கௌரவமாக நடத்தினர் என்பது புரிகிறது.

இப்படிப் புராணங்கள் பசு மாடுகளைப் போற்றுவதைத் தற்கால அறிவியல் கண்டுபிடிப்புகளும் உறுதிப்படுத்துகின்றன. பசு இயற்கையாக இறந்த பின் அதன் கொம்பைச் சேகரித்து, அதன் உள்ளிருக்கும் துளையில் பசுஞ்சாணம் இட்டுப் பூமியில் புதைக்க வேண்டும். ஆறு மாதத்திற்குப் பிறகு அந்த மட்கிய பசுஞ்சாணத்தை வெளியில் எடுத்து வயலுக்குப் பயன்படுத்தினால் அது மிகச் சிறந்த இயற்கை உரமாகிறது.

மாட்டின் கொம்பு வான்வெளியில் உள்ள பல சக்திகளைக் கொம்பின் மூலம் ஆகர்ஷிக்கிறது. அப்படிச் சேகரித்ததைத் தன் காலடி வழியாகப் பூமியில் செலுத்துகிறதாம்.

பசுமாட்டின் கொம்புக்குச் சக்தியைச் சேகரித்து வைக்கும் தன்மை உள்ளது. பசுஞ்சாணத்தில் சுண்ணாம்புச் சத்து அதிகம். இது இயற்கையில் உருவாகும் நுண்ணுயிர்களுக்கும் பயிர்களுக்கும் உதவும். இவ்வாறு அதிசய சக்தியுள்ள பசுவின் கொம்புச் சாண உரம் மிகக் குறைந்த அளவே நீரில் கரைத்து ஊற்றினாலும் நிலத்தின் உயிர்ச்சத்து அதிகரிக்கும்.

இப்படிப் பல சிறப்புகளை உடைய பிராணிக்கு நன்றி பாராட்டும் தினமே மாட்டுப் பொங்கல். பல இல்லங்களில் ‘கனு’ என்ற பெயரில் பறவைகளுக்கு சித்திரான்னம் வைப்பர். பெண்கள் தங்கள் பிறந்த வீட்டிற்காகப் பிரார்த்திப்பர். மாடு வைத்திருப்போர் பூஜை செய்வர். மாட்டின் கொம்புகளில் புது வஸ்திரம் சுற்றுவர். மஞ்சுவிரட்டு, ஜல்லிக்கட்டு போன்ற வீர விளையாட்டுகளும் அன்று நடைபெறும்.

அனைவரிடமும் ஆசி பெற வைக்கும் காணும்பொங்கல்:

பொங்கல் திருவிழாவின் கடைசி நாள் காணும் பொங்கல். பெரியவர்களிடம் நேரில் சென்று ஆசி பெறும் நாள். அன்று சுற்றத்தாரிடமும் நண்பரிடமும் சென்று பழகி மகிழும் தினம். பிறரிடம் இணைந்து இருந்து அவர்களது நற்பண்புகளைக் வளர்த்துக் கொள்ள வேண்டும் என்பதை உணர்த்தும் நாள்.

இப்படி அகந்தை அகன்று தூய மனத்தினராகி தேவர்களையும், மிருகங்களையும், சகமனிதர்களையும் மதித்து வாழ வேண்டும் என்பதை உணர்த்துவதுதான் வேதம் கூறும் வாழ்க்கை முறை.

பொங்கல் விழா அந்த வாழ்க்கை முறையை உணர்த்துகிறது. வளம் பெருகி, ஆரோக்கியம் நிறைந்து எல்லா நல்ல உறவுகளுடன் இணங்கி வாழ்ந்து ஆனந்தம் பொங்க இறைவன் நம் எல்லோருக்கும் அருளட்டும்.