மேலும் நமது புறத்திலும் நம்மைச் சுற்றியுள்ள மனிதர்களிடமும் ஒவ்வொரு வருடத்திலும்  புதுப்புது நரகாசுரன்கள் நாட்டிலும் சமுதாயத்திலும், ஏன் சமயத்திலும் ஆங்காங்கே தோன்றுகிறார்கள்.

நமது நாட்டிற்கு இந்த வருடம் வந்து வதைப்பட்ட நரகாசுரன் யார் தெரியுமா? 

கொரோனா தொற்றுதான்.

நமது அரசு நிர்வாகத் திறமையாலும் உழைப்பாலும் அந்தக் கொடிய கொரோனா நரகாசுரனை நாம் பணிய வைத்துவிட்டோம். பிற நாடுகளிலும் அச்சுறுத்தும் அந்த நரகாசுரனை வைப்பதற்கு நாம் மருத்துவ உதவியைச் செய்ய தயாராக உள்ளோம்.

அதைவிட மோசமான நரகாசுரர்களும் உண்டு. அன்னிய நாட்டு அச்சுறுத்தல்கள், அந்நிய நாட்டினரின் ஊடுருவல்கள், போர் பயம் காட்டி நம் நாட்டின் ஒற்றுமைக்குப் பங்கம் விளைவிப்பவர்கள், பொருளாதாரத்தை முடக்குபவர்கள் போன்ற பல நரகாசுரர்கள் நம் நாட்டை முற்றுகையிடுகிறார்கள்.

அந்த நவீன நரகாசுரர்களை நம்முள் எத்தனை பேர் அடையாளம் கண்டுகொண்டோம்!

நம் சமுதாயத்திலும் நரகாசுர ஆதிக்கம் உள்ளது. அவற்றுள் மிகவும் மோசமானவை இரண்டு. நம் மக்களிடையே இருக்கும் அசிரத்தை மற்றும் கண்ணை மூடிக்கொள்ளும் பூனையின் பொறுப்பின்மைதான் அந்த இரண்டு நரகர்கள். எதையுமே எள்ளி நகையாடும் அல்லது உயர்ந்த குறிக்கோள் இல்லாமல், தாயுமானவர் கூறுவதுபோல் 'உண்டு உடுத்தித் திரியும் இரண்டு கால் மாடு போல...' பிழைக்கும் ஒரு துர்க்குணம் மக்களிடையே தாண்டவமாடுவதைப் பார்க்கிறோம்.

நம் நாட்டின் பாரம்பரிய பெருமையைப் புரிந்து கொள்ளாது கண்ணாடி மாளிகைக்குள் இருந்துகொண்டு வெளியில் கல்வீசுபவனின் நிலை பலரிடம் காணப்படுகிறது.

சுவாமி விவேகானந்தர் மிகவும் நேசித்த நம் பாரத பூமியில் தாய்நாட்டு பற்றின்மை என்ற அரக்கனை நாம் புதைப்பதற்கு ஆண்டவனின் சக்தியைத் திரட்டிக் கொள்வோம். பாரத மாதாவை எள்ளி நகையாடுபவர்களைச் சரவெடிகளாகக் கொளுத்த வேண்டிய காலம் இது.

சனாதன தர்மமான இந்து தர்மத்தின் மீதும் எத்தனையோ நரகாசுரர்கள் விமர்சனப் போரையும், சமயக் காழ்ப்புணர்ச்சியையும் தூண்டி வருகிறார்கள். அதனால் நம் மக்கள் கோழைகள் போல் பகவானை நாடாமல் பணம் சம்பாதிப்பதிலேயே திரிகிறார்கள். அதனால் சமுதாய நல்லிணக்கமும் மதநல்லிணக்கமும்  கேள்விக்குறியாகிறது;  கேலிக்குரியதாகிறது.

இன்று நம் நாட்டைச் சுற்றியுள்ள இது போன்ற நரகாசுரன்களைக் கண்டு கொள்வோம். இந்த தீபாவளி நன்னாளில் இவர்களது முயற்சிக்கு  வேட்டு வைப்போம்.

சமுதாயத்தில் மக்களின் ஒற்றுமையையும் நல்லிணக்கத்தையும் மத வியாபாரிகள் செய்யும் அட்டூழியங்களையும் தடுத்து நிறுத்த பகவான் ஸ்ரீகிருஷ்ணரை, அவர் கூறிய பேடித்தனம் இல்லாத வலிமையை நாம் பின்பற்றுவோம். ஸ்ரீகிருஷ்ணர் நமக்குள் வந்துவிட்டால் நரகாசுரன்கள் ஓய்ந்தும் ஒளிந்தும் விடுவார்கள்.

இந்து மதத்தின் மீது குறிவைத்துத் தாக்கும் விமர்சனங்களால் எள்ளி நகையாடும் நவீன நரகாசுரன்களை வதைத்திட, தெய்வ சாந்நித்தியத்தை நமக்குள் பெருக்கிக் கொள்வதற்கு இந்த தீபாவளித் திருநாளில் நாம் உறுதி ஏற்போம். நம் முயற்சியாலும் பிரார்த்தனையாலும் நவீன நரகாசுரர்களை நாசம் செய்வார் நமது பரந்தாமன் ஸ்ரீ கிருஷ்ணர்.

இந்த தீபாவளி திருநாளில் அதுவே நமது பிரார்த்தனை ஆகவும் பிரயத்தனமாகவும் மாறட்டும்.

ஜெய் ஸ்ரீ ராமகிருஷ்ணா.