ஒரு நிமிட உன்னதம் - 26

நாம் சற்றும் எதிர்பாராத விதத்தில் குழந்தைகளின் பதில்கள் சில சமயங்களில் அமையும் .

பெரியவர்கள் பேசியதை அவர்கள் பேசுவார்கள். வாழ்க்கையை அனுபவித்தவர்களாகப் பேசுவார்கள். முன் ஜென்மத்து அனுபவ அறிவோ என்று வியக்க வைக்கும்படி அவர்களது பதில்கள் சில சமயம் அமையும்.

அது போன்ற ஓர் அனுபவம் துறவிக்கு இன்று கிடைத்தது. குழந்தைகளுக்கான புத்துணர்வு முகாமில் துறவி ஒரு வீடியோ பதிவைக் காண்பித்தார்.

விபத்தில் அடிபட்டு நாய் ஒன்று எழ முடியாமல் தண்டவாளத்தின் நடுவில் கிடக்கிறது. அதனது 'நண்பன் நாய்' அடிபட்ட நாயைத் தூக்கிச் செல்ல முடியாமல் தவிக்கிறது. திணறுகிறது.

முடிவில், அதனுடனேயே இருந்து வாழ்வா, சாவா என்று பார்த்துவிடத் தீர்மானிக்கிறது. பல ரயில்கள் அந்தப் பாதையில் செல்லும் போதும் அடிபட்ட நாய் எழ முடியாமல் பெட்டிகளுக்கு நடுவில் கிடக்கிறது. நண்பனை விட்டுச் செல்ல மனமில்லாமல் நண்பன் நாயும் குனிந்து ஒவ்வொரு முறையும் உயிர் தப்பிக்கிறது. 

முடிவில், யாரோ சிலர் இரண்டு நாய்களையும் காப்பாற்றிவிட்டனர். இந்தச் சம்பவத்திலிருந்து என்ன கற்றீர்கள் என்று துறவி குழந்தைகளிடம் கேட்டார்.