உணர்வூட்டும் கதைகள் - 26

இன்று கிருஷ்ண ஜன்மாஷ்டமி. கிருஷ்ணன் உதித்த தினம். கோடிக்கணக்கான பக்தர்கள் உலகம் முழுவதும் இந்தத் தினத்தைத் தங்களது பிறந்த தினத்தைவிட மிக சிறப்பாகக் கொண்டாடிக் கொண்டிருக்கிறார்கள்.

பூஜை, பாராயணம், நாம சங்கீர்த்தனம், உறியடி திருவிழா, பாகவதப் பிரவசனம், நாட்டியம், தேர் திருவிழா என்றெல்லாம் கொண்டாடி கண்ணனைப் போற்றிப் பக்தர்கள் பாடுவார்கள்.

பாலகிருஷ்ணனின் பெரும் பக்தரான சுவாமி விவேகானந்தர் பக்தர்களின் மேற்கூறிய பக்தியை மேம்படுத்துவதற்காகத் தோன்றியவர். சுவாமிஜியின் கருத்துகளைப் போற்றும் வகையில் இதோ ஒரு வித்தியாசமான கற்பனை கதை.

நண்பர்களே! கிருஷ்ண கானம் நாம் பாடுவோம். அதோடு, கிருஷ்ணர் நம்மைப் பாராட்டுகிறாரா என்று பார்ப்போம்.

கண்ணனின் கண்ணில் கண்ணீர் ஏன்?

"நம் குருநாதர் காலையிலிருந்து கவலையாக இருக்கிறாரே, ஏன் என்று தெரியவில்லையே?'' என்றார் ஒரு பக்தர்.

“பிருந்தாவனத்திலுள்ள 3000 கோவில் களையும்விட மிகப் பிரம்மாண்டமான கோவில் ஒன்று கட்ட உள்ளோம். அதற்காக நம் சுவாமிகள் கவலைப் படுகிறாரோ?" என்றார் இன்னொரு நிர்வாகி.

அந்த 'விஸ்வ கிருஷ்ண மந்திர் குழு' அங்கத்தினர்கள் பத்து பேரும் இவ்வாறு பேசியபடி தங்களது ஆச்சாரியருக்காகக் காத்திருந்தனர்.

அதோ, கிருஷ்ணதாஸ் என்ற அந்த மடாதிபதி வருகிறார். எப்போதும் கிருஷ்ண தியானத்திலேயே திளைக்கும் அவரது முகத்தில் ஏன் இன்று இப்படி ஒரு சோகம்? என்று சீடர்கள் கூர்ந்து அவரையே கவனித்தார்கள். சீடர்கள் தங்களது ஆச்சாரியரை வணங்கினர்.

''மகராஜ், ஏன் உங்களது திருமுகத்தில் ஒரு வட்டம் தெரிகிறது?"

கிருஷ்ணதாஸிடமிருந்து பதில் இல்லை.

"மகராஜ், மந்திர் கட்டுவது பற்றி நீங்கள் எந்தத் தயக்கமும் கொள்ள வேண்டியதில்லை. பணம், பொருள் என்று எல்லா வகையிலும் ஆதரவுகள் நமக்குக் குவிகின்றன'' என்று கூறிய குழுத் தலைவரை நோக்கினார் கிருஷ்ணதாஸ் மகராஜ்.

ஆச்சாரியரின் அமைதி அனைவரையும் கவ்வியது. அவர் அந்தர் முகமாக இருப்பது அனைவரையும் வியக்க வைத்தது.

ஒரு சில நிமிட ஆழ்ந்த அமைதிக்குப் பிறகு ஆச்சாரியார்,

"அன்பர்களே, பிருந்தாவனத்தின் மகிமையைக் கூட்டுங்கள் என்று என் குருதேவ் கூறினார். அதனால்தான் இவ்வளவு பெரிய கோவில் கோடிக்கணக்கான பொருட்செலவில் கட்டத் துணிந்தோம். ஆனால்...''

"ஆனால் என்ன சுவாமிஜி சொல்லுங்கள்?"

"ம்.... கிருஷ்ண பகவான் பலமுறை அடியேனுக்கு தரிசனம் தந்து அருளி இருக்கிறார். குழல் ஊதும் கண்ணனாக, பசுக்களை மேய்க்கும் பாலனாக, கோபிகைகளுடன் நர்த்தனம் புரிபவனாகப் பல வடிவங்களில் தரிசனம் தந்த ஸ்ரீகிருஷ்ணன் நேற்று ஏன் அவ்வாறு தரிசனம் தந்தார்?'' என்று கூறும்போதே அவரது கண்களில் பிரவாகமெடுத்தது கண்ணீர். அந்தப் பக்திக் கண்ணீர் தூய யமுனை நீரோ!