RAMAKRISHNA MATH, THANJAVUR - Blog #Sri Ramakrishna Vijayam

அன்னை ஸ்ரீசாரதாதேவி தியானம்

Wed, 10 Dec 2025 20:43:16 +0530

ஸ்ரீராமகிருஷ்ண விஜயம் டிசம்பர், 2025 மாத இதழில் வெளிவந்த சுவாமி விமூர்த்தானந்தர் எழுதிய தியானம்.

The Article by Swami Vimurtananda appeared in Sri Ramakrishna Vijayam in December, 2025

வாழ்க்கையின் சாரத்தை எங்களுக்குத் தரும் சாரதாம்மா! உங்களை ஆழ்ந்து தியானிக்க வேண்டும் என்பது எனது பல நாள் ஆசை. இன்று அந்த வாய்ப்பு கிடைத்திருக்கிறது.

யோகிகள் தங்களைத் தியானிக்கிறார்கள். அன்றைய முனிவர்களும் இன்றைய துறவிகளும் உங்களது கடைக்கண் பார்வைக்காகக் கடுந்தவம் புரிகிறார்கள். ஆனால் வேலைப் பளுவும் பல விதமான இன்னல்களும், தாபமும் தளர்ச்சியும், மோகமும் முதிர்வில்லாத அறிவும் கொண்டுள்ள நான் தங்களைத் தியானிக்க ஆசைப்படுகிறேன்.

அகிலம் ஈன்ற தூய அன்னையே, உங்களையே நம்பியுள்ள நான் உங்கள் குழந்தை அல்லவா! இந்தப் பிள்ளைப்பூச்சியையும் தங்கள் திருமடியில் ஏந்திக்கொள்ளுங்கள்.

தாயே, உங்களது திருமுகத்தைக் காண்கின்றேன். மதுரமான குரலில் என்னை அந்தத் திருமுகம் ‘வா, குழந்தாய் வா’ என்று அழைப்பதைக் கேட்கிறேன். தெய்விக மலரான தங்களது கருணையைப் பற்றிச் சிந்திக்கும்போது, தங்கள் அன்பைச் சுவைக்கும்போது நானும் ஒரு வேலைக்காரத் தேனீ என்பதை உணர்கிறேன். நீங்கள் ராணித் தேனீயாக இருந்து உங்கள் தலைமையின் கீழ் வேலைக்காரத் தேனீயாக இருப்பது ஸ்ரீராமகிருஷ்ணர் அடியேனுக்கு அருளிய சொர்க்க நிலை அல்லவா!

உண்பதும் உறங்குவதும் உணர்வின்றித் திரிவதும் என்ற இந்த உலகியல் வாழ்வு எனக்குப் போதும். ‘போதும் இங்கு மாந்தர் வாழும் பொய்மை வாழ்க்கையெல்லாம்’ என்று மகாகவி பாரதியார் பாடியது மெல்ல மெல்ல எனக்குப் புரிகிறது.

நான் இதுவரை உலகக் கடமை என்று எங்கெங்கோ சுற்றிச் சோர்ந்துவிட்டேன் தாயே. என்னை என்றும் உங்கள் பக்கத்தில் அல்ல, உங்கள் அகத்திலேயே வைத்திருங்கள்.

குழப்பங்கள் எனக்கு வரும்போது, ‘என்னை நீ ஏன் படைத்தாய் அம்மா?’ என்று புலம்புகிறேன்.

தங்கள் திருக்கடாக்ஷம் என் மீது பட்டாலோ, ‘நீங்கள் என்னை ஏன் படைத்துள்ளீர்கள்? அதன் உயர்ந்த நோக்கம் என்ன? நான் என்ன செய்ய முடியும்? என்ன செய்ய வேண்டும்?’ போன்ற உயர்ந்த உண்மைகள் எனக்கு விளங்குகின்றன.

சாரதாம்மா, ‘ஸ்ரீராமகிருஷ்ணரிடத்தில் நான் வந்தவுடன் என் அகத்தில் ஓர் அமுதகலசம் வைக்கப்பட்டது’ என்று நீங்கள் கூறினீர்கள். அம்மா, அந்த அமுதகலசத்திலிருந்து ஒரு துளியாவது எனக்கும் தந்தருளுங்கள்.

தாயே, பொருட்பற்று சார்ந்த வாழ்க்கை எனக்குப் போதுமம்மா. உங்கள் அருள் நிறைந்த வாழ்க்கையை எனக்கும் அருளுங்கள். உங்கள் திருக்கண்கள் காட்டும் வழிகாட்டுதலுக்காக நான் கண் விழித்துக் காத்திருக்க அருள மாட்டீர்களா? உங்கள் வழிகாட்டுதலின்படி எனது வாழ்க்கையில் ஒவ்வொரு கணமும் செல்ல எனக்கு அருளக் கூடாதா தாயே?

ஓய்வின்றி உயர்ந்த லட்சியத்துடன் வேலை செய்வதும், தொய்வின்றித் தெய்வத்தின் இணக்கத்துடன் வாழ்வதும்தான் உங்கள் வாழ்க்கையின் சாரம் என்று நீங்கள் உபதேசிக்கும் இந்த உத்தம நிலையை எனக்கும் வழங்குங்கள்.

ஸ்ரீசாரதைத் தாயே! சந்திரனைக் கண்டும் அதிலும் களங்கம் காணாதவர் நீங்கள். உங்களைச் சுற்றிலும் பணப் பைத்தியங்களும் குழப்பவாதிகளும் உங்கள் குடும்ப அங்கத்தினர்களாக இருந்தபோதும் அவர்களிடத்திலும் குற்றம் காணாதவர் நீங்கள். ஆனால் நானோ ஒவ்வொருவரிடத்திலும் ஓராயிரம் குற்றங்களைக் காண்கிறேன். பிறர் குற்றம் பற்றிப் பேசவும் செய்கிறேன். அந்த நிலை மாற்றிக் குற்றம் காணாத குணத்தை எனக்கும் அருளுங்கள்.

ஸ்ரீசாரதைத் தாயே, இளம்வயதில் நீங்கள் அதிகாலையில் பிரம்ம முகூர்த்தத்தில் ஸ்நானத்திற்குச் செல்லும்போது அஷ்டதேவியர்கள் உங்களுக்கு முன்னும் பின்னும் சென்றார்களே.... இனி ஒரு முறை அவ்வாறு நீங்கள் செல்வதற்கு முன் அந்த வீதியைச் சுத்தம் செய்யும் கைங்கரியத்தை எனக்கு அருள்வீர்களா?

எங்கு எப்படியோ அங்கு அப்படி! யாருக்கு எப்படியோ அவருக்கு அப்படி! எப்போது எப்படியோ, அப்போது அப்படி! என்று குருதேவர் உங்களுக்குச் செயல்முறை ஞானம் வழங்கினார். அந்தச் செயல்முறை, அத்திறமை எனக்கில்லை. ஆகவே என்னை உங்கள் பக்கத்தில் வைத்துக்கொண்டு என்னை வழிநடத்தவும்.

அதனால் நான் விரைவில் நல்ல மனிதப் பிறவி என்ற ஆசியை உங்களிடமிருந்து பெறுவேன்.

யாருக்கு எது தேவையோ, அதைத் தரும் பக்குவத்தை, தைரியத்தை, அறிவாற்றலை எனக்குத் தந்தருளுங்கள்.

என்னைச் சுற்றியுள்ளவர்கள் ஒவ்வொரு நேரத்தில் ஒவ்வொரு விதமாக நடந்துகொண்டாலும் நான் பொறுப்புள்ளவராகத் திகழ்ந்து என் கடமையைச் சீராகவும் சிறப்பாகவும் செய்திட எனக்கு வலிமையைத் தாருங்கள்.

ஸ்ரீசாரதைத் தாயே! காட்டின் நடுவே கொள்ளைக்காரன் உங்களைக் கண்டான். உங்களுடன் வந்திருந்தவர்கள் உங்களைத் தனியே விட்டுவிட்டுப் போய்விட்டார்கள். அப்போது நீங்கள் அந்தக் கொள்ளைக்காரனிடம் உங்களது மதுரமான குரலில் அவனது மகளாக, ‘அப்பா, நீங்கள் வந்துவிட்டதால் எனக்குப் பயம் எல்லாம் போய்விட்டது’ என்று கூறினீர்கள். உங்களது அன்பை உணர்ந்த கொடூரமான அந்தக் கொள்ளைக்காரன் எப்படி உங்களுக்கு அப்பாவானார்.... ஆச்சரியம் தூய அன்னையே.

ஸ்ரீசாரதைத் தாயே! என்னைச் சுற்றிலும் பல கொள்ளையர்கள் உண்டு. என் பக்தி, என் புத்தி, என் கவனம், என் நேரம், என் திறமை போன்றவற்றைப் பறித்துச் செல்லும் கொள்ளையர்கள் பலரும் இருக்கிறார்கள். பல சங்கடங்களும் சோதனைகளும் இன்னல்களும் துன்பங்களும் வருகின்றன.

நீங்கள் கொள்ளையனை அன்புக் கள்வன் ஆக்கியதுபோல், என் பிரச்சினைகளைச் சவால்களாகப் பார்க்கும் சாமர்த்தியத்தை எனக்கும் தந்தருளுங்கள்.

ஸ்ரீராமகிருஷ்ணரின் மகிமையை முற்றிலும் உணர்ந்த சாரதாம்மா, எனது வாழ்க்கைப் படகு ஏதோ தன் போக்கில் திசை மாறிப் போய்க்கொண்டிருக்க, என் மனம் எனும் பாய்மரத்தை விரித்துக்கொண்டேன். தங்கள் அருள் எனும் அன்புக்காற்று புத்துணர்வாக எனக்குள் புகுந்துள்ளது.

இனி ஸ்ரீராமகிருஷ்ண அருளில் தோய்ந்த அந்தப் புதுப்பிறவியை வாழ்வதற்கு உங்களது ஆசீர்வாதத்தை என்றும் நாடுகிறேன்.

ஆகவே, நாங்கள் இனி வாழும் ஒவ்வொரு கணமும் இகத்திலும் பரத்திலும் எங்களுக்கு வழிகாட்டுங்கள். எங்களது வழியில் உள்ள தடைகளை நீக்குங்கள் என்று உங்களையே சரணடைகின்றோம்.

ஓம் ஐம் ஹ்ரீம் சர்வதேவ தேவீ ஸ்வரூபிண்யை ஸ்ரீசாரதா தேவ்யை நம:

ஓம் சாந்தி: சாந்தி: சாந்தி:

சுவாமி விமூர்த்தானந்தர்

ஸ்ரீராமகிருஷ்ண விஜயம்

டிசம்பர், 2025

பகவான் உண்டால் பக்தனின் பசி தீரும்!

Wed, 27 Nov 2024 16:42:02 +0530

ஸ்ரீராமகிருஷ்ண விஜயம் டிசம்பர், 2024 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in December, 2024

எனது இந்த ஒரு வாயால் மட்டுந்தான் நான் சாப்பிடுகிறேனா? - அன்னை ஸ்ரீசாரதாதேவி எல்லா உயிர்களின் தாயாக இருந்து அருளிய வாக்கியம் இது.

பகவான் ஸ்ரீராமகிருஷ்ணரும் அந்திம காலத்தில் தமது ஆன்மிக உச்ச நிலையை உணர்த்துவதற்கு இதே வாக்கியத்தைப் பயன்படுத்தினார்.

கீதையும் உபநிஷதமும் இது போன்ற வெளிப்பாடுகளை தெய்வ வாக்கியங்களாக மொழிகின்றன.

ஸ்ரீதேவீ மஹாத்மியத்தில் ஸ்ரீதுர்க்காதேவி சும்பன் என்ற அரக்கனிடத்தில் தன்னை வெளிப்படுத்திக் கொண்ட விதமும் இவ்வாறு உள்ளது.

ஸ்ரீலலிதா சகஸ்ரநாமம் தேவியை பூமரூபா என்று அழைப்பதை ஸ்ரீசாரதாதேவியாரும் ஸ்ரீராமகிருஷ்ணரும் இவ்வாறு உரைத்தார்களோ!

இப்படிப் பல சாஸ்திர பிரமாணங்கள் கொண்ட ஒன்றை அன்னை உரைத்த சம்பவம் என்ன?

அன்னை ஸ்ரீசாரதாதேவி வங்காள மக்கள் இயல்பாக உண்ணும் சில உணவுகளைத் தவிர்த்து வந்தார். அதைப் பார்த்து ஒரு பக்தர் அன்னை செய்யாத ஒன்றை அவரும் செய்ய விரும்பவில்லை. அன்னை அவரிடம் அந்த உணவை உண்ணுமாறு வலியுறுத்தினார். அவர் பக்தியால் மறுத்தார்.

அன்னையோ, மகனே, நீ அதைச் சாப்பிடு. நானென்ன எனது இந்த ஒரு வாயால் மட்டும் சாப்பிடுகிறேன் என்று நினைத்தாயா...? என்று கேட்டுவிட்டு ஆழமாகப் புன்னகைத்தார்.

ஸ்ரீசாரதாதேவியின் சரிதத்தை எழுதிய புகழ்பெற்ற ரா.கணபதி, ... அன்னை அவ்வளவு பெரிய பேச்சை அலேக்காக அப்படியே சொல்லிவிட்டார் என்று எழுதி வியப்பார்.

இந்த வாக்கியத்தின் முக்கியத்துவத்தை அறிந்தால் நம்மிடம் பக்தி முகிழ்க்கும்.

ஸ்ரீராமகிருஷ்ணரால் தமது அந்திம காலத்தில் உண்ண முடியவில்லை. அதை அவர் பொருட்படுத்தவும் இல்லை. ஆனால் பக்தர்களோ, பவதாரிணிதேவியிடம் சென்று பிரார்த்தனை செய்தால் அன்னை உங்களை உண்ணச் செய்வார் என்று கூறினர்.

குழந்தைபோல் குருதேவரும் தேவியிடம் சென்று அதைக் கூறினார். ஸ்ரீராமகிருஷ்ணரின் அசல் நிலையை அகிலத்திற்கு அறிவிக்க, மகனே, நீ உனது இந்த ஒரு வாயினால் மட்டும் உண்கிறாயா என்ன? நீ உலக உயிர்கள் ஒவ்வொருவரின் வாயின் மூலமாகவும் அல்லவா உண்டு வருகிறாய்? என்று கூறி தேவி பரிகசித்தார்.

அதைக் கேட்டு ஸ்ரீராமகிருஷ்ணர் பக்தர்களிடம், நீங்கள் கேட்டதை நான் கூறியதால் அல்லவா தேவி என்னைக் கேலி செய்தார்! தேவி அவ்வாறு என்னிடம் கேட்டதும் எனக்கு வெட்கமாகிவிட்டது என்று கூறி வருந்தினார்.

உயிர்களின் உடலிலுள்ள ஜீரணசக்தி நானே - ஸ்ரீ கிருஷ்ணர்

சூரியனிலும் சந்திரனிலும் தமது சக்தியே ஒளியாக விளங்குகிறது என்று கீதையில் ஸ்ரீகிருஷ்ணர் கூறினார். மனிதர்களுக்குள் பகவான் எவ்வாறு வீற்றிருந்து விளங்குகிறார் என்பதைத் தொடர்ந்து கூறும்போது

अहं वैश्वानरो भूत्वा प्राणिनां देहमाश्रितः ।

प्राणापानसमायुक्तः पचाम्यन्नं चतुर्विधम् ॥

நான் உயிர்களின் உடம்பில் வைச்வானர அக்னியாக இருந்து கொண்டு பிராணன் மற்றும் அபானனுடன் கூடி நான்கு விதமான உணவை ஜீரணம் செய்கிறேன் (15.14) என்று விளக்கினார்.

இறைவனே உணவைப் படைக்கிறார். உணவை உண்கிறார். உண்டதைச் செரிப்பதற்கான சக்தியும் அவரே என்பதை பரந்தாமன் வெளிப்படுத்தினார்.

உயிரினங்கள் உணவை ஜீரணிக்கச் செய்யும் வயிற்றில் உள்ள நெருப்பே கடவுள் என்று பிருஹதாரண்யக உபநிஷதமும் பகர்கிறது.

இந்த தெய்விக உண்மையை ஸ்ரீசாரதாதேவியும் ஸ்ரீராமகிருஷ்ணரும் தங்களது எளிய நடையில் கூறியது ஆச்சரியத்தைத் தருகிறது அல்லவா!

உலகில் தேவி மட்டுமே இருக்கிறாள்!

அசுர சக்திகளுடன் அறிவற்ற எல்லா அரக்கர்களும் செய்வதையே அரக்கனான சும்பனும் செய்து வந்தான். தேவர்கள் துர்க்கா தேவியிடம் முறையிட்டார்கள். தேவி மகிஷாசுரமர்த்தினியாக அவனை வதைக்கத் தோன்றினாள்.

போரின்போது துர்க்கையின் பல்வேறு வெளிப்பாடுகளான தேவிகளைக் கண்டு சும்பன் பயந்தான். அம்பிகையைச் சாடினான். தன்னிடம் தனியாகப் போர் செய்யுமாறு கூவினான். அம்பிகை உடனே தனது மற்ற தேவிமார்களைத் தமக்குள்ளேயே ஏற்றுக் கொண்டார். அப்போது தேவி (10.4),

एकैवाहंजगत्यत्रद्वितीयाकाममापरा।

पश्यैतादुष्टमय्येवविशन्त्योमद्विभूतयः॥१०.५॥

இவர்களெல்லாம் எனது அம்சாவதாரமானவர்கள் என்னைத் தவிர வேறல்லர். அவர்கள் அனைவரும் என்னிடமே புகுவதைப் பார். சும்பா, நான் தனித்தே நிற்கிறேன்; யுத்தத்திற்கு வா என்று அழைத்தாள்..

தேவைப்படும்போது பிற உயிர்களை தேவி தோற்றுவிக்கிறார். நேரம் வரும்போது தனக்குள்ளேயே ஈர்த்துக் கொள்கிறார். ஆக, இருப்பது தேவி மட்டுமே என்பதை தேவி மஹாத்மியம் நமக்குப் புரிய வைக்கிறது.

அந்தப் பேருண்மையை ஸ்ரீசாரதையும், நான் ஒரு வாயால் மட்டுமே உண்கிறேனா? என்று கூறித் தமது விச்வாத்ம நிலையை வெளிப்படுத்தினார் போலும்.

ஸ்ரீலலிதா சகஸ்ரநாமத்தில் பூமாதேவியின் திருநாமங்களில் ஏகாக்னி, பூமரூபா - ஆகிய திருநாமங்கள் தேவி ஒருத்தியாக இருந்தாலும் அனைத்துமாக விளங்கும் தன்மை அவளுடையது என்பதைத் தெளிவாக்குகின்றன. பூமா எனில் பெரியது.

இவ்வாறு சாஸ்திரங்கள் பரம்பொருளின், பராசக்தியின் மற்றும் அவதாரங்களின் லட்சணங்களை மேற்கூறியவாறு உரைக்கின்றன. மூன்று உதாரணங்களை அவதாரபுருஷர்களின் வாழ்க்கையிலிருந்து அறியலாம்.

பகவான் உண்டால் பக்தனின் பசி தீருமா?

பாண்டவர்கள் வனவாசத்தில் மிகுந்த சிரமத்துடன் வாழ்ந்து வந்தார்கள். தெய்விகப் பரிசாக திரௌபதிக்கு அக்ஷயபாத்திரம் வழங்கப்பட்டிருந்தது. அதன் மூலம் தினமும் எத்தனை ஆயிரம் பேருக்கு வேண்டுமானாலும் திரௌபதி உணவு வழங்க முடியும். ஆனால் அவள் உணவருந்திய பின் அன்று அக்ஷயபாத்திரம் மேற்கொண்டு உணவு வழங்காது.

துரியோதனன் கோபக்கார துர்வாச முனிவரையும் அவரது 12000 சீடர்களையும் பாண்டவர்களிடம் வஞ்சகமாக அனுப்பினான். முனிவர் வனத்திற்குச் சென்று பாண்டவர்களை ஆசீர்வதித்தார். நீராடிய பிறகு உணவருந்த வருவதாக உரைத்து நதிக்குச் சென்றார்.

பாண்டவர்கள் திகைத்து நின்றனர். திரௌபதி அப்போதுதான் உண்டு முடித்திருந்தாள். தினமும் ஆயிரக்கணக்கானவர்களுக்கு அமுது படைத்த ராணி, இப்போது தர்ம சங்கடத்தில்...

உடனே கிருஷ்ணரை வேண்டினாள். மாயக்காரன் அங்கு வந்து அவனும் பசிக்கிறது என்றான். திரௌபதிக்கு அழுகையே வந்திருக்கும் அல்லவா?

ஏதாவது ஒரு பருக்கையாவது இருக்கிறதா என்று அக்ஷயபாத்திரத்தில் தேடினார் கண்ணன். ஆஹா, கண்ணனின் கண்களில் ஒரு பருக்கை தென்பட்டது. அதை அவர் தன் திருவாயில் இட்டார்.

பகவான் உண்டதும் நதியில் நீராடிக் கொண்டிருந்த முனிவருக்கும் சீடர்களுக்கும் வயிறும் மனதும் நிறைந்தன. அவர்கள் பாண்டவர் களுக்குச் சிரமம் தர வேண்டாம் என்று அங்கிருந்து சொல்லிக் கொள்ளாமலேயே சென்று விட்டார்கள்.

ஸ்ரீராமகிருஷ்ண பாகவதத்தில் ஒரு நிகழ்வுஸ்ரீராமகிருஷ்ணர் தமது தொண்டைப்புண் நோயால் உண்ண முடியாமல் உடல் மெலிந்து வந்தார். அதனால் அவரது சிஷ்யை கோலாப்மா அவரை கொல்கத்தாவிலுள்ள ஒரு மருத்துவரிடம் அழைத்துச் சென்றார். குருதேவர், கோலாப், சீடர்களான லாட்டு மற்றும் காளி ஆகியோர் படகில் கொல்கத்தா புறப்பட்டனர்.

காலையில் எதுவும் உண்ணாமல் கிளம்பினர். மருந்து வாங்கித் திரும்பும்போது பகல் மணி 1.30 ஆகிவிட்டது. கடும்பசி.

கோலாப்மாவிடம் நான்கு பைசாக்கள் மட்டும் இருந்தன. குருதேவர் அதைக் கொண்டு சில இனிப்புகளை வாங்கி வருமாறு காளியிடம் கூறினார். காளி இனிப்பை குருதேவரிடம் கொடுத்தார். பொதுவாக குருதேவர் தமக்கு வரும் உணவுப் பொருட்களைச் சிறிது வாயிலிடுவார். பிறகு அதைப் பிரசாதமாகச் சீடர்கள் ஏற்பார்கள்.

ஆனால் இன்று ஸ்ரீராமகிருஷ்ணர் ஒவ்வோர் இனிப்புத் துண்டமாக உண்ண ஆரம்பித்தார். கடும்பசியில் இருந்த மூன்று சீடர்களும் ஆச்சரியமாக அவரது செயலைக் கண்டார்கள். குருதேவர் மொத்த இனிப்பையும் உண்டு விட்டு கங்கை நீரை அள்ளிக் குடித்து ஏப்பம் விட்டதும் மூன்று சீடர்களுக்கும் பசி பறந்து போனது. உண்ட திருப்தி உடம்பெங்கும் நிறைந்தது.

சீடர்கள் ஒருவரை ஒருவர் வியப்புடன் பார்த்துக் கொண்டனர். தங்களது பசி எப்படி மாயமாய் மறைந்தது என்று அதிசயித்த அவர்கள் குருநாதரை வணங்கினர்.

காளி பிற்காலத்தில் சுவாமி அபேதானந்தராக மலர்ந்தார். ஸ்ரீராமகிருஷ்ணரிடம் வந்து அருள் பெற்ற பிறகு தமக்கு பல பிறவிப் பிணிகள் இல்லாமல் போனது என்று பதிவு செய்துள்ளார்.

சீடன் அனுபவிக்க வேண்டிய கர்ம வினைகளை குருவே ஏற்றுக்கொண்ட உத்தம நிலை அது. சீடன் உண்ண வேண்டிய இனிப்பை குருவே உண்டு சீடனின் பசியாற்றிய விதம் போல!

இன்னும் ஓர் ஆனந்தமான நிகழ்ச்சி. சுவாமி அகண்டானந்தர் சார்காச்சியில் இருந்த ஏழைகளுக்கு அன்பு, அறிவு, உணவு, உணர்வு ஆகியவற்றை அபமிதமாக வழங்கி வந்த காலம் அது.

அன்று ஸ்ரீராமகிருஷ்ணன் ஜயந்தி விழா அன்னதானத்துடன் கொண்டாடப்பட்டது. நூற்றுக்கணக்கான ஏழைகள் பசியில் வாடியபடி காத்திருந்தார்கள். அனைவருக்கும் கிச்சடி என்ற உணவு பமாறப்பட இருந்தது. கிச்சடி சமைக்க நேரமானது. பிறகு அது ஸ்ரீராமகிருஷ்ணருக்கு நிவேதிக்கப்பட வேண்டும். அதன் பிறகே பரிமாறப்படும். நேரம் கடந்து கொண்டிருந்தது. மக்கள் பசியால் துடித்துக் கொண்டிருந்தார்கள். அப்போது அகண்டானந்தருக்கு ஓர் உணர்வு நிலை அனுபவம் ஏற்பட்டது. திடீரென்று பகவான் ஸ்ரீராமகிருஷ்ணர் அகண்டானந்தர் முன் தோன்றி, பொறுமை இழந்தவர்போல் அவடம் சொன்னார்:

கங்கா, என்ன இது, என் பிள்ளைகள் எப்போது பமாறுவார்கள் என எதிர்பார்த்தபடி பசியோடு அமர்ந்திருக்கிறார்கள். எனக்கு இங்கே நிவேதனம் செய்வதை விட்டுவிட்டு நேராக அவர்களுக்குப் பமாறு. அவர்களின் வாய்மூலமாக நான் உண்பேன்.

அகண்டானந்தரும் அப்படியே செய்தார். அனைவரும் மகிழ்ச்சியோடு உண்டனர்.

ஸ்ரீராமகிருஷ்ணர் நான்கு சீடர்களுக்கும் இவ்வாறு தமது பேருணர்வு நிலையை வெளிப்படுத்தி வியக்க வைத்தது ஓர் உன்னத வரலாறு என்றால்...,

இன்னொரு சீடர் மூலம் பகவான் அன்புக்கு அடிபணிகிறார் என்பதைப் புரிய வைக்கிறார். பாபுராம் தனது குருவும் தெய்வமுமான ஸ்ரீராமகிருஷ்ணர் அந்திமக் காலத்தில் உணவு உண்ண முடியாமல் இருந்தபோது அவரை உண்ணும்படி வலியுறுத்தினார்.

அப்போது குருதேவர், ...நான் என் சூட்சுமமான உடல் மூலமாக கோடிக்கணக்கான வாய்கள் வழியாக உண்கிறேன் என்றார் பெருமிதமாக.

பகவானின் மகிமையில் கவனம் செலுத்தாமல் அவரது சேவையில் மட்டும் ஈர்ப்பு கொண்டிருந்தவர் பாபுராம். அவர் குருதேவரிடம் செல்லக் கண்டிப்புடன், உங்கள் கோடிக்கணக்கான வாய்களையோ அல்லது சூக்ஷ்மமான உடலையோ பற்றி எனக்குத் தெரியாது. நான் விரும்புவதெல்லாம், நீங்கள் உங்களது இந்த வாய் வழியாகச் சாப்பிட வேண்டும். தங்களது இந்தத் திருமேனிக்கு நான் தொண்டு புரிய வேண்டும் என்று கூறினார்.

உடனே குருதேவர் வாய் நிறைய உண்டார். அன்பெனும் பிடியில் அகப்படும் மலையான குருதேவரை எப்படிப் பிடிக்க வேண்டும் என்பதை பாபுராம் மகராஜ் (சுவாமி பிரேமானந்தர்) நமக்குக் காட்டித் தந்தார்.

கலியுகத்தில் உயிர் உணவையே பெரிதும் சார்ந்து இருக்கிறது என்று ஸ்ரீராமகிருஷ்ணர் கூறினார். ஆதலால் உணவை மதிப்போம். உணவை எல்லோர் மூலமாகவும் ஏற்கும் உணர்வாளனைத் துதிப்போம். உணவைச் செரிக்கும் சக்தியையும் காப்போம். அதற்கு இந்த மந்திரத்தைக் கூறி ஒவ்வொரு நாளும் உண்போம்.

ஹரியே தானம் செய்பவர், ஹரியே உணவை உண்பவர், ஹரியே அன்னம், பிரஜாபதியாக உள்ளவர். ஹரியே பிராமணர், உடல் என்பதும் ஹரிதான், உணவை உண்டு உணவு வழங்குகிறவரும் ஹரியே. v

சுவாமி விமூர்த்தானந்தர்

ஸ்ரீராமகிருஷ்ண விஜயம்

டிசம்பர், 2024

இந்தியாவின் முதுகெலும்பு சமயம்தான்!

Thu, 01 Jun 2023 18:57:56 +0530

ஸ்ரீராமகிருஷ்ண விஜயம் ஜூன், 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in June, 2023.

சென்னை ஸ்ரீராமகிருஷ்ண மடத்தின் 125 -ஆம் ஆண்டு நிறைவு விழாவில் 26.03.2023 அன்று சுவாமி விமூர்த்தானந்தர் ஆற்றிய உரையிலிருந்து....

தமிழகத்திற்கும் சுவாமிஜிக்கும் உள்ள தொடர்பு வரலாற்று முக்கியத்துவம் வாய்ந்தது. தமிழ்நாட்டினால் விவேகானந்தருக்குப் பெருமை பெருகியதா? விவேகானந்தர் விஜயம் செய்ததால் தமிழ்நாட்டிற்கு மகிமை கூடியதா? இது ஆராய்ச்சி செய்ய வேண்டிய ஒரு விஷயம்.

வங்காளத்தில் அவர் பிறந்திருந்தாலும் தமிழகம்தான் அவரைக் கண்டுபிடித்தது. அதனால்தான் விவேகானந்தரைப் பெற்றெடுத்தது வங்காளம்; அவரைத் தத்தெடுத்தது தமிழகம்! என்று பாரதப் பிரதமர் மாண்புமிகு நரேந்திர மோடி ஒருமுறை கூறினார்.

எந்தப் பிறவிப் பணியோடு சுவாமிஜி உலகிற்கு வந்தாரோ, அதற்கான களம் அவருக்குக் கிடைத்தது தமிழகத்தில்தான். அவருக்குத் தேவியின் தரிசனம் கிடைத்ததும் இங்குதான்.

எல்லோரும் சொந்த முக்திக்காக, நிம்மதிக்காக தியானம் செய்வார்கள். ஆனால் தமது நாட்டின் முன்னேற்றத்திற்காக கடலில் கன்னியாகுமரிப் பாறை மீது தியானம் செய்த ஒரே துறவி சுவாமி விவேகானந்தர்தான்.

அமெரிக்கா முன்னேறினால் அமெரிக்காதான் பயனடையும். பாகிஸ்தான், ஒருவேளை முன்னேறினால், பாகிஸ்தான் மட்டுமே பயன் பெறலாம். ஆனால் பாரதம் முன்னேறினால் பாரெங்கும் முன்னேற்றம் இருக்கும். இந்த மாபெரும் உண்மையைக் கண்டுபிடித்து சுவாமி விவேகானந்தர் உரைத்தது தமிழ்நாட்டில்தான்.

அமெரிக்கா செல்வதற்கு முன்பு தமிழகத்தில் சுவாமிஜி இருந்தபோது இங்கிருந்த பின்னணி என்ன தெரியுமா?

1892-ல் இந்து நாளிதழில் சிகாகோவில் சர்வ சமயப் பேரவை நடக்க உள்ளது என்ற அறிவிப்பும் தலையங்கமும் வெளிவந்தன. அதில் இந்து மதம் இன்றைய சமுதாயத்தின் நடைமுறைப் பிரச்னைகளுக்குத் தீர்வு தருவதாக இல்லை. இந்து மதத்திற்கு எதிர்காலம் இல்லை என்று கூறப்பட்டிருந்தது.

இந்து சமயத்தைப் புனரமைப்பது சாத்தியமே இல்லை. இந்து மதம் உயிரில்லாமல் நிற்கிறது, அதன் காலம் முடிவடைந்துவிட்டது.

உலகிற்கு வழங்க எங்களிடம் எதுவுமே இல்லை என்று அங்கு போய்ச் சொல்ல வேண்டும். அதற்கு வேண்டுமானால் ஒருவரை அனுப்புங்கள் என்று பத்திரிகைகளில் கிண்டலடித்தார்கள்.

இம்மாதிரியான வாத, பிரதிவாதங்கள் நடந்தபோது யாரையாவது சர்வ சமயப் பேரவைக்கு அனுப்ப வேண்டும் என்ற ஆவல் சில சென்னை இளைஞர்களுக்குத் தோன்றியது. அவர்கள் நம் சமயத்திலிருந்து சிகாகோவிற்குச் செல்ல யாருமே இல்லையா? என்று எண்ணி வருந்தினார்கள்.

அந்தச் சமயத்தில் சுவாமி விவேகானந்தர் சென்னையில் இருந்தார். அளசிங்கப் பெருமாளும் அவரைச் சேர்ந்த இளைஞர்களும் சுவாமி விவேகானந்தரே சர்வ சமயப் பேரவையில் கலந்துகொள்ள தகுதியானவர் என்று தீர்மானித்தனர். சுவாமிஜியிடம் அவ்வாறே கேட்டுக் கொண்டனர்.

ஆனால் சுவாமி விவேகானந்தர் உடனே கிளம்பி விடவில்லை. தூய அன்னை ஸ்ரீசாரதாதேவியின் ஆசியையும் அனுமதியையும் வேண்டிக் கடிதம் எழுதினார். அதோடு, மேற்கத்திய நாடு செல்லும் திட்டத்தில் இறைவனின் கட்டளை என்னவென்று உணர்ந்து கொள்ள கன்னியாகுமரி சென்றார். 1892-ஆம் ஆண்டு டிசம்பர் 24, 25, 26 ஆகிய நாட்களில் பாறையின் மீது அமர்ந்து தவம் செய்தார்.

சுவாமிஜி கன்னியாகுமரியில் பெற்ற ஆன்மிக அனுபவம் ஆழமானது. அதனை அவரே பதிவு செய்துள்ளார்: அகத்திலும் புறத்திலும் எதைத் தேடி அலைந்தேனோ, அது இந்த இடத்தில் எனக்குக் கிடைத்தது..... மேலை நாட்டிற்குச் சென்றாக வேண்டும். இப்போது நான் தயாராகிவிட்டேன். இதயபூர்வமாக வேலை செய்வோம். பலனை தேவி தருவாள். அவள் என்னிடம் பேசினாள்.

சுவாமி விவேகானந்தர் வரலாற்றை எழுதிய சிறந்த அறிஞரும் பக்தருமான திரு. ரா.கணபதி இவ்வாறு கூறுகிறார்: மேலைநாடுகளுக்கு சுவாமிஜி தனியாகவா சென்றார்? அவருடன் ஆழ்வார்கள், நாயன்மார்கள், மீராபாய், ஆண்டாள் போன்றோரும் சென்றனர். மேலும் சைவம், வைணவம், சாக்தம் என்று என்னென்ன பிரிவுகள் இந்து தர்மத்தில் இருக்கின்றனவோ, அவை அனைத்தும் சுவாமிஜிக்குப் பக்க பலமாகச் சென்றன. இந்தியப் பாரம்பரியம் அவருடனேயே சென்றது. பலப் பல துறவிகள், மகான்கள், அருளாளர்கள் என்று யாரெல்லாம் பாரத பூமி நன்றாக விளங்க வேண்டும் என்று சிந்தித்தார்களோ, உழைத்தார்களோ, நினைத்தார்களோ, தியானித்தார்களோ, பிரார்த்தித்தார்களோ அவர்களுடைய ஆன்மிகச் சக்தியும் திரண்டு சுவாமி விவேகானந்தருடன் சென்றது.

சர்வ சமயப் பேரவையில் 23-வது நபராக சுவாமி விவேகானந்தர் பேசினார். காலையிலிருந்து அமர்ந்திருந்த அக்கூட்டமானது களைத்திருந்தது. சுவாமி விவேகானந்தர் பேசிய நேரம் பிற்பகல் மூன்று மணிக்கு மேல் Sisters and Brothers of America என்ற வாக்கியத்தை சுவாமிஜி தமது ஆன்ம பலத்தால் உரைத்தபோது 4000 பேரும் எழுந்து நின்று கரவொலி எழுப்பினர்.

அது நம் பாரதத் தாய்க்குக் கிடைத்த மாபெரும் வெற்றி. ஒற்றை வரியால் பாரதத்தின் ஆன்மிகம் உலகையே வென்ற வரலாற்றுப் பதிவு அது.

1897, ஜனவரி 23-இல் சுவாமிஜி தாயகத்திற்கு வரும் முன்பு இலங்கை வழியே வந்தார். யாழ்ப்பாணத்தில் வேதாந்தம் பற்றிப் பேசினார். பெரும் கூட்டம். ஒலிபெருக்கி கிடையாது. மைக் இல்லாததால் உரக்கப் பேச வேண்டும். சுவாமி விவேகானந்தர் மிக விரைவில் மகாசமாதி அடைந்ததற்குப் பல காரணங்களுள் ஒரு காரணம், அவர் தன் நுரையீரல் சக்தியை (lungs power) அதிகம் உபயோகப்படுத்தியதுதான்.

அன்று அவர் The subject is vast; time is short - பேச வேண்டிய பொருளோ மிகப் பெரிது, நேரமோ குறைவு என்று உரையைத் தொடங்கினார். மக்கள் கை தட்டினார்கள்.

ஆனால் ஓர் இளைஞர் மட்டும் இந்த வாக்கியத்தின் தாக்கத்தை உணர்ந்தார். ஆம், உண்மைதானே! நம் வாழ்வும் இப்படித்தானே இருக்கிறது. அடைய வேண்டிய பொருள் பிரம்மம் - பரம்பொருளான இறைவன் - பரந்துபட்டதாக இருக்கிறது. நமது வாழ்நாளோ சில ஆண்டுகள்தான். இதற்குள் நாம் பரம்பொருளை எய்த வேண்டும்.

அவ்வாறு அந்த இளைஞர் யோசித்து அந்த மந்திர வாக்கியத்தையே தியானித்தார். சில வருடங்களுக்குப் பிறகு அந்த இளைஞர் இலங்கையில் முக்கியமான ஒரு மகானாக - யோகர் சுவாமிகளாக மலர்ந்தார். பிற்காலத்தில் இலங்கையிலுள்ள சிங்களவர்கள், இஸ்லாமியர்கள், கிறித்தவர்கள், இந்துக்கள் ஆகிய அனைத்துச் சமயத்தினரையும் ஈர்க்கும் ஆற்றல் பெற்ற மகானாக யோகர் சுவாமிகள் விளங்கினார்.

சுவாமி விவேகானந்தர் எப்படிப்பட்ட மந்திர சக்தி மிக்க வாக்கியங்களுடன் உரையாற்றினார் என்பதை இதன் மூலம் நாம் தெரிந்து கொள்ள வேண்டும்.

தனிமனிதரும் சமுதாயமும் தன்னம்பிக்கையோடு இருக்க வேண்டும். இதற்கு மேல், நாடே தன்னம்பிக்கையோடு இருக்க வேண்டும் என்று விஸ்தாரமாகச் சொன்னவர் சுவாமி விவேகானந்தர். அந்த ஒரு சிந்தனையை இப்போது ஆத்மநிர்பர் பாரத் - தற்சார்பு மிக்க இந்தியா என்கிறார்கள். விவேகானந்தரிடமிருந்து வந்த அந்த வீரிய விதை இன்னும் சிறிது காலத்தில் விருக்ஷமாக மாறும் என்பது உறுதி.

சுவாமிஜி தமது மிக முக்கியமான செய்திகளை எல்லாம் தமிழ்நாட்டிலிருந்துதான் உரைத்தார். விக்கிரகத்தில் மட்டும் சிவனைக் காண்பவன் சாதாரண பக்தன்; உலக மக்கள் அனைவருள்ளும் சிவனைக் காண்பவன் உன்னத பக்தன் என்று ராமேஸ்வரம் கோவிலில் கூறினார்.

நமது பூமி யாருடையது என அரசியல் அரட்டை அரங்கில் சிலர் இன்று கொக்கரிக்கிறார்கள். ஆனால் 125 வருடங்களுக்கு முன்பே தமிழகம் மட்டுமல்ல, மொத்த இந்தியாவே ஆன்மிக பூமி என்பதை இந்தியாவின் முதுகெலும்பு சமயம்தான் என்று ஜனவரி 25-இல் ராமநாதபுரத்தில் சுவாமிஜி அடித்துச் சொன்னார்.

ராமேஸ்வரம், பாம்பன், ராமநாதபுரம், மானாமதுரை, மதுரை, திருச்சி, தஞ்சாவூர், கும்பகோணம், சென்னை ஆகிய நகரங்களில் மக்களை வீறு கொண்டு எழச் செய்த வீரிய விதைகளை தமிழக ஊர்கள்தோறும் தூவிக் கொண்டே வந்தார் சுவாமிஜி.

மேலும், நம் இளைஞர்கள் மேலைநாட்டு முட்டாள்தனமான பல பழக்க வழக்கங்களைப் பின்பற்றுவதை சுவாமிஜி கண்டித்தார். அந்த முட்டாள்தனம் இன்றும் தொடர்வதை நாம் வேதனையுடன் காண்கிறோம்.

ஆனால் சுவாமிஜி மேற்கத்திய நாட்டிலிருந்து நாம் எதைக் கற்க வேண்டும் என்பதைத் தெளிவாகக் கூறினார்: உலகப் பொருட்களைப் பற்றிய அறிவு, நிறுவனங்களின் சக்தி, அதிகாரங்களைக் கையாளும் திறமை, குறைந்த சக்தியைப் பயன்படுத்தி நிறைந்த பலன்களைப் பெறும் திறமை - இவற்றையெல்லாம் நாம் மேற்கத்திய நாட்டிலிருந்து கற்க வேண்டும். நமது ஆன்மிகப் பாரம்பரியத்தை நாம் அவர்களுக்குக் கற்றுத் தர வேண்டும். உலக குருவாக நமது நாடு மாற வேண்டும் என அடிமை நாட்டிலிருந்து கூறினார்.

உலக அரங்குகளில் அன்று இந்தியாவிற்கு மதிப்பு கிடையாது. நாய்களும் இந்தியர்களும் இங்கு வரக் கூடாது என்று போர்டு எழுதி வைத்திருந்த காலத்தில் சுவாமிஜி இதைக் கூறினார். அந்தச் சமயத்தில் சுவாமி விவேகானந்தர் தன்னம்பிக்கையோடு சென்று அங்கு வீர கர்ஜனை செய்ய முடிந்தது என்றால் அதற்கு அவரது ஆன்ம பலமே காரணம்.

ஒரு சிறந்த நிர்வாகத் திட்ட அலுவலர் போல் சுவாமிஜி செயல்பட்டார். நாம் முறையாகவும் கடுமையாகவும் உழைத்தால், 25 வருடங்களில் நம் எல்லாப் பிரச்னைகளும் தீர்ந்துவிடும்; இந்தியாவில் வறுமையே இருக்காது என்று 1897-லேயே கூறினார்.

சுவாமிஜி சொன்னதை நாம் கடைப்பிடித்தோமா என்றால் இல்லை. சுதந்திரத்திற்குப் பின் நம் மக்களும், நம்முடைய அரசியல்வாதிகளும் தலைவர்களும் ஒரு தேனிலவு மூடிற்குப் போய்விட்டார்கள் என்று சுவாமி ரங்கநாதானந்தஜி மகராஜ் கூறுவார். விவேகானந்தரை, விடுதலைக்கு முன்பு நாம் எப்படி வைத்துக் கொண்டிருந்தோமோ, எப்படிப் படித்தோமோ அதே மாதிரி விடுதலைக்குப் பிறகும் அவ்வாறே செய்திருந்தால் இந்தியா மோசமான நிலைக்குச் சென்றிருக்காது.

இந்தியாவில் இன்று ஊழலும் அப்பட்டமான அரசியல் சீரழிவும், மத துவேஷமும், தகுதியற்ற பல அரசியல் தலைவர்களும், பொறுப்பற்ற பல அரசு அதிகாரிகளும் இருக்கிறார்கள். ஆனால் இன்றைக்கும் நாம் நல்லபடியாக வளர்வோம் என்ற நம்பிக்கையை நமக்குத் திரும்பத் திரும்பக் கூறுவது சுவாமி விவேகானந்தரின் கருத்துகளே.

அவரது உரைகள் அடங்கிய நூல்களின் ஆற்றலானது உங்கள் ஒவ்வொருவருக்குள்ளும் வர வேண்டும். அவ்வாறு நடக்க வேண்டும் என்று சுவாமி விவேகானந்தர் காத்துக் கொண்டிருக்கிறார். அவர் ஊர் ஊராகச் சென்று ஆன்மிக விதைகளை விதைத்தார். அவற்றை யாரெல்லாம் உள்வாங்கிக் கொள்கிறார்களோ, அவர்களுக்கு ஒளிமயமான எதிர்காலம் சத்தியமாக உண்டு.

பாம்பனில் தொடங்கி சென்னை வரையிலும் சுவாமிஜி தமிழகத்தில் பயணித்துச் சொற்பொழிவாற்றிய அதே ஊர்களில், அதே தினங்களில், வருடந்தோறும் அவரது நினைவையும் கருத்துகளையும் போற்றும்படி நிகழ்ச்சிகள் நடத்தப்பட்டால் தமிழ்நாடு மீண்டும் தனது பழம்பெருமையைப் பெறும்; மகிமையை உணரும்.

சுவாமி விமூர்த்தானந்தர்

ஸ்ரீராமகிருஷ்ண விஜயம்

ஜூன், 2023

குழம்பித் தவிப்பவர்களா இளைஞர்கள்?

Wed, 31 May 2023 14:25:53 +0530

ஸ்ரீராமகிருஷ்ண விஜயம் ஜூன், 2023 மாத இதழில் வெளிவந்த சுவாமி விமூர்த்தானந்தர் எழுதிய கேள்வி பதில்கள்.

The Article by Swami Vimurtananda appeared in Sri Ramakrishna Vijayam in June, 2023.

கேள்வி: மாண்புமிகு பிரதமர் நரேந்திரமோடி அவர்கள் கூறும் ஆத்ம நிர்பர் பாரத் - தற்சார்பு இந்தியா என்ற ஆக்கபூர்வமான சிந்தனையானது அடிப்படையில் சுவாமிவிவேகானந்தரின்கருத்துஎன்று கூறப்படுகிறதே, அது உண்மையா? - மாணவி மாலினி, திருவாரூர்.

பதில்: ஆம், தனிமனிதனுக்கு மட்டுமல்ல, நம் நாட்டுக்கே தன்னம்பிக்கை அவசியம் என்று முழங்கியவர் சுவாமி விவேகானந்தர்.

தற்சார்பு இந்தியா என்ற ஒரு கருத்து மட்டுமல்ல, சுவாமிஜி ஆற்றிய தமிழகச் சொற்பொழிவுகளைப் படித்துப் பாருங்கள். அவற்றிலுள்ள விவேகானந்தரின் வீரிய விதைகள் சாதாரண மனிதனை லட்சிய மனிதனாக்கும்; அந்த லட்சிய மனிதனால் மேம்பட்ட சமுதாயத்தை உருவாக்க முடியும்; அடிமை நாட்டை உலகையே ஆளச் செய்யும் நாடாக மாற்றும் சக்தி அந்தச் சிந்தனைகளுக்கு உண்டு.

அவை எல்லாச் சமுதாய மற்றும் சமயங்களின் முன்னேற்றத்திற்காக அறிவுடனும் அக்கறையுடனும் அண்ணல் விவேகானந்தர் அருளியவை. ஓர் இந்தியன், விவேகானந்தரின் சிந்தனைகளுள் ஒரு முறையாவது மூழ்கினால்தான் அவன் முழு மனிதனாவான். சிறந்த இந்தியன் ஆவான்!

கேள்வி: இளைஞர்கள் என்றாலே குழம்பித் தவிப்பவர்கள் என்று பெரியவர்கள் குற்றம்சாட்டுவது, சரியா? - மாணவி அனுசுயா, நீலாங்கரை.

பதில்: இவ்வாறு குற்றம் சாட்டுபவர்கள் வயதில் மட்டும் வளர்ந்தவர்களா அல்லது அறிவிலும் வளர்ந்தவர்களா என்று பார். அறிவிலும் அனுபவத்

திலும் வளர்ந்தவர்கள் இளைஞர்களைத் தங்கக்கட்டிகளாகக் காண்பார்கள். அந்தத் தங்கக்கட்டிகள் நல்ல நகைகள் ஆக வேண்டும் என்று விரும்புவார்கள்.

அண்மையில் திருவாரூரில் உள்ள டிரினிட்டி அகடமி பள்ளியில் ஒரு மாணவியிடம், நீ வருங்காலத்தில் என்னவாக அதாவது என்ன பதவி வகிக்க விரும்புகிறாய் என்று கேட்டேன்.

அதற்கு அந்த மாணவி நிதானமாக, முதலில் நான் ஒரு நல்ல மனுஷியாகிறேன். அப்படி நான் மாறிவிட்டால் எந்தப் பதவியையும் என்னால் திறமையாகவும் பிறரது நன்மைக்காகவும் செய்யமுடியும், இல்லையா? என்றாள்.

இளைஞர்கள் தெளிவாக உள்ளார்கள்!

தெளிவுடன் இருந்தாலே அவர்கள் இளைஞர்கள்தான்!

கேள்வி:125 ஆண்டுகளைப் பூர்த்தி செய்யும் ராமகிருஷ்ண மிஷனின் முக்கியக் கோட்பாடு அல்லது செய்தி என்ன? அதை எனது இளம் நண்பர்கள் புரிந்துகொள்ளும் வகையில் எளிமையாகக் கூறுங்கள் சுவிர் அவர்களே! - மாணவன் பிராணதீஸ்வரன், நீலகிரி.

பதில்: பொதுவாக, வாழ்வின் ஆரம்பத்தில் நாம் மட்டும் முன்னேற வேண்டும் என்று ஆசைப்படுவோம். ஆனால் வாழ்வில் வளர வளர நாமும் முன்னேறி, பிறரையும் முன்னேற்றினால்தான் நமது வாழ்க்கை முழுமை பெறும் என்பது தெளிவாகும்.

தனிமனிதனின் தகுதியும் திறமையும் உயர்ந்தால் அந்த நாடும் உயரும். இது சுவாமி விவேகானந்தரின் ஒரு முக்கிய சிந்தனை. நான் முறையாக நல்லவனாக இருப்பது எவ்வளவு முக்கியமோ, அதேயளவு என்னைச் சேர்ந்தவர்களையும் அவ்வாறு வைத்திருப்பது எனது கடமை ஆகிறது.

ஓர் எளிய உதாரணம். முன்பெல்லாம் ஹைவேஸில் காரில் போகும்

போது நமது டிரைவர் ஒழுங்காக ஓட்டிச் சென்றால் போதும், எந்த விபத்தும் நடக்காது.

ஆனால் இப்போதெல்லாம் நாம் நல்லபடி ஓட்டினால் மட்டும் போதாது. கண்டபடி எதிரே ஓட்டி வரும் அல்லது நமது முன்னோ, பின்னோ செல்லும் வாகன ஓட்டிகளும் மது குடித்திருக்காமல், மொபைலில் பேசிக் கொண்டு வராமல் கவனமாக ஓட்ட வேண்டும். தெருவில் வேகமாகப் போகிறேன் என எருமை வாகனம் உடையவரின் லோகத்திற்கு விரையக் கூடாது. இவ்வாறு நாம் நம்மோடு பயணிக்கும் மற்ற டிரைவர்களுக்காகவும் கடவுளிடம் வேண்டிக் கொண்டே பயணிப்போம். அந்தப் பிரார்த்தனையால் நமது பயணமும் பிறரது பயணமும் இனிதாகும்.

இந்த ஒரு முக்கியமான செய்தியை சுவாமி விவேகானந்தர் ஆத்மனோ மோக்ஷார்த்தம்; ஜகத் ஹிதாய ச - நீயும் முன்னேறி, பிறரையும் முன்னேற்று என்று ராமகிருஷ்ண மிஷனின் கோட்பாடாக வகுத்தார்.

சுவாமி விமூர்த்தானந்தர்

ஸ்ரீராமகிருஷ்ண விஜயம்

ஜூன், 2023

எந்நாட்டவர்க்கும் இறைவா போற்றி

Wed, 19 Apr 2023 18:01:07 +0530

ஸ்ரீராமகிருஷ்ண விஜயம் மே, 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in May, 2023.

எந்நாட்டவர்க்கும் இறைவா போற்றி! - இதனை இப்படியும் புரிந்து கொள்ளலாமே?

சிவ பக்தர்களின் உள்ளத்தைக் கொள்ளை கொள்ளும் ஒரு வாசகம் இது: தென்னாடுடைய சிவனே போற்றி! எந்நாட்டவர்க்கும் இறைவா போற்றி!

மாணிக்கவாசகர் அருளிய இந்த மந்திர வாக்கியம் சைவ நெறியைக் காலம் காலமாகத் தழைத்தோங்கச் செய்து வருகிறது.

அருளாளர் அருளிய வாக்கியங்களைப் பற்றி சிந்திக்கச் சிந்திக்க அதன் வீச்சு, அதன் உயர் பொருள் ஆழமாக விளங்கும்.

தென்னாடுடைய சிவனே போற்றி என்றால் தென்பூமியான தமிழகத்தின் சிவனே, நீ வாழி என்று ஒரு பொருள்.

உயர்ந்த திசை தென் திசை என்று வில்லிபுத்தூர் ஆழ்வார் சித்திக்கொரு விதையாகிய தென்னாடு என்று கொண்டாடுகிறார். சித்தி என்றால் ஞானம், பக்தி என்று பொருள்.

அடுத்து, எந்நாட்டவர்க்கும் இறைவா என்றால் உலகிலுள்ள எல்லா நாட்டினருக்கும் ஓர் இறைவன் உண்டென்றால் அவர் நம் சிவபெருமான்தான்.

இரண்டாவது வாக்கியம் பற்றிச் சிறிது அவதானிக்கலாம். உலகமெல்லாம் நீக்கமற நிறைந்திருக்கும் தெய்வம் எங்கள் தென்னாடான தமிழகத்து தெய்வம் என்று முதல் பொருளாகக் கூறப்படுகிறது.

ஒரு காலத்தில் சைவம் உலகமெல்லாம் செழித்து வளர்ந்திருந்தது. சோழர்கள் வென்ற நாடுகளில் சிவாலயங்கள் கட்டப்பட்டுள்ளன. தற்போது ஜெனீவா நகரில் உள்ள CERN என்ற அறிவியல் ஆராய்ச்சி அமைப்பின் பிரதானமான இடத்தில் நடராஜர் சிலை வைக்கப்பட்டுள்ளது. அதற்குக் காரணம் நடராஜ தத்துவம் விஞ்ஞான ரீதியாக அங்கு ஆராய்ச்சி செய்யப்பட்டு வருகிறது.

மேற்கூறிய இரண்டு வாக்கியங்களும் நிலத்தை மட்டுமே பிரதானமாகக் கூறுகின்றன.

அதனால் எந்நாட்டவர்க்கும் என்பதை பக்தியோடு உரைத்த பிறகு ஆழமாகச் சிந்திப்பது அவசியமாகிறது.

கீதா என்ற பதத்தைப் பலமுறை உச்சரித்தால் தாகீ தாகீ என்று வரும். கீதையின் சாரமாக, இறைவனுக்காக ஏனைய எல்லாவற்றையும் தியாகம் செய் என்று பக்தனுக்குக் கூறப்படுகிறது என்பார் ஸ்ரீராமகிருஷ்ணர்.

அதுபோல், எந்நாட்டவர்க்கும் என்பதைப் பலமுறை கவனத்துடன் உச்சரித்தால் எந்நாட்டவர்க்கும் அதாவது எந்த நாட்டத்தையும் உடையவருக்கும் என்ற பொருள் மிளிர்கிறது. எந்நாட்டவர் - எந்நாட்டத்தவர், எப்படிப்பட்ட நாட்டமும் உடையவர் என்று பொருள் விரிகிறது.

சிவபெருமானை அணுகியவர்களது நாட்டம் எத்தன்மை வாய்ந்திருந்தாலும் இறைவன் அவர்களைத் தம்மோடு இணைத்துக் கொள்கிறார்.

இறைவன் காட்டில் தன்னந்தனியே தவிக்கிறார் என்று பாசத்தில் நாட்டம் வைத்துப் பரிதவித்தவர் கண்ணப்ப நாயனார்.

பாலுக்காக நாட்டம் கொண்டவர் திருஞானசம்பந்தர்.

போகத்தில் சிறிது நாட்டம் இருந்த சுந்தரப் பெருமானை சிவபோகத்தில் ஆழ்த்தினார் எம்பெருமான். அடியார்களின் சேவையில் நாட்டம் கொண்டவர் திருக்குறிப்புத் தொண்டர்.

இவ்வாறு நாட்டங்கள் - விருப்பங்கள் - தேவைகள் எப்படி இருந்தாலும் அவர்களது அந்தராத்மா நாடியதை ஆண்டவன் அவர்களுக்கு அருளினார். உலகியல் நாட்டம் மட்டுமல்ல, வேறு எந்த தெய்வ நாட்டம் இருந்தாலும் அங்கு தோன்றுவது சிவபெருமானே என்கிறது சிவஞான சித்தியார்.

யாதொரு தெய்வம் கொண்டீர் அத்தெய்வமாகி ஆங்கே

மாதொரு பாகனார்தாம் வருவர் ......

சர்வதேவ நமஸ்காரம் கேசவம் ப்ரதி கச்சதி...-எந்த தெய்வத்தை வழிபட்டாலும் அந்த நமஸ்காரம் கேசவனைத்தான் சென்றடையும் என்றும் கூறப்படுகிறது.

பாலூட்டுவதற்குத் தாய் தவிப்புடன் இருக்கும்போது குழந்தை மிட்டாய்க்காக - தனி நாட்டத்துடன் - அழுவதுபோல் இருப்பது இந்த நிலை.

உறங்காவில்லிதாசர் என்ற மல்லர் தன் காதலியின் கண்களில் சொக்கிக் கிடந்தார். ஸ்ரீராமானுஜர் அவரிடம் பெருமாளின் திரு நயனங்களின் காருண்யத்தைக் காட்டினார். உடனே தாசரை, தேகக் காதலிலிருந்து தெய்வக் காதலுக்கு ஏங்க வைத்தது ஸ்ரீராமானுஜரின் ஆச்சாரிய மகிமை.

அடியார்கள் எந்த நாட்டத்தைக் கொண்டிருந்தாலும் முடிவில், அந்த நாட்டத்தின் மூலமாக அவர்களைத் தம்மையே நாடும்படி திருத்திப் பணி கொள்கிறார் இறைவன். இது ஸ்ரீராமகிருஷ்ண அவதாரத்தில் தெளிவாகத் தெரிகிறது.

இனி பள்ளி செல்ல வேண்டாம். பரீட்சையின்றி நிம்மதியாக இருக்கலாம் என்ற நிம்மதி நாட்டத்துடன் பகவான் ஸ்ரீராமகிருஷ்ணரிடம் வந்தவர் சுவாமி பிரேமானந்தர்.

ஸ்ரீராமகிருஷ்ணர் தெய்விக போதையில் இருப்பதைப் பார்த்தார் காளிபதகோஷ் என்ற குடிகார பக்தர். ஸ்ரீராமகிருஷ்ணரிடம் சென்றால் அதிக போதை தரும் மது கிடைக்கும் என்ற மது நாட்டத்தில் வந்தவர் அவர். அவருக்கு ஸ்ரீராமகிருஷ்ணர் தெய்விகப் போதையைத் தமது போதனைகளின் மூலம் காட்டியருளினார்.

இவ்வாறு பக்தர்களும் துறவிகளும் தாங்கள் எந்த நாட்டம் கொண்டிருந்தாலும் அதனை இறைவனோடு தொடர்புபடுத்திக் கொண்டார்கள். அதனால் இறைவன் அவர்களது நாட்டத்தையும் நிறைவேற்றினார். அதோடு அவர்களது அந்தக் குறுகிய நாட்டத்தின் முழு பரிமாணத்தையும் காட்டி தம்மோடு இணைத்துக் கொண்டார்.

ஆதலால் இனி பக்தர்கள் எந்நாட்டவர்க்கும் இறைவா என்று கூவி அழைக்கும்போது எந்த நாட்டம் உடையவர்க்கும் இறைவா, நீதான் எங்களது மலினமான நாட்டத்தை மடைமாற்றம் செய்து திருத்திப் பணிக்கொள்ள வேண்டும் என்று வேண்டிக் கொள்வோம்.

சுவாமி விமூர்த்தானந்தர்

ஸ்ரீராமகிருஷ்ண விஜயம்

மே, 2023

ஸ்ரீராமகிருஷ்ணரின் வாழ்விலிருந்து மாணவன் கற்க வேண்டியது?

Tue, 21 Mar 2023 19:16:25 +0530

ஸ்ரீராமகிருஷ்ண விஜயம் ஏப்ரல், 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in April, 2023.

கேள்வி: ஒரு மாணவன் ஸ்ரீராமகிருஷ்ணரின் வாழ்க்கையில் இருந்து கற்க வேண்டியது என்ன?

பதில்: ஒவ்வொரு மாணவ மாணவியும் ஸ்ரீராமகிருஷ்ணரிடமிருந்து மூன்று முக்கிய பாடங்களைப் படிக்க வேண்டும்.

1. யோகத்தில் ஒரு மிக முக்கிய நிலை நிர்விகல்ப சமாதி எனப்படும். அதை அடைவதற்குப் பலருக்கும் ஒரு முழு வாழ்க்கை தேவைப்படும். ஸ்ரீராமகிருஷ்ணரின் குருவான தோதாபுரிக்கு அந்த நிலையை அடைய 40 ஆண்டுகள் ஆயின.

ஆனால் ஸ்ரீராமகிருஷ்ணர் தமது அபாரமான மன ஒருமைப்பாட்டினாலும், சிரத்தையினாலும் மூன்றே தினங்களில் அந்தப் பெருநிலையை அடைந்தார்.

தான் கொண்ட லட்சியத்தைச் சீக்கிரம் சாதிப்பது என்ற மனோதிடத்தை மாணவன் அவரது வாழ்வில் இருந்து கற்க வேண்டும்.

2. பலர் ஓரிரு டிகிரிகளை வாங்கியவுடன் நான் படித்து முடித்துவிட்டேன் என்பார்கள்.

ஆனால் வாழும் வரை கற்றுக் கொண்டே இருப்பேன் என்று ஸ்ரீராமகிருஷ்ணர் கூறினார்.

இதுவும் மாணவனே, உனக்கு அவசியமில்லையா?

3. ஸ்ரீராமகிருஷ்ணர் முதலில் ஹிந்து சமய முறைகளைப் பின்பற்றி அதன் அனுபவ உச்சத்தைத் தொட்டார். அதன் பின் அவர் கிறிஸ்தவம், இஸ்லாம் போன்ற மற்ற சமய உண்மைகளையும் அனுபவத்தில் கண்டார்.

ஒவ்வோர் அனுபவத்தையும் பெறுவதற்கு அவரது இறை ஏக்கமே மிக முக்கியமான கற்பதற்கான கருவியாக அவருக்கு இருந்தது.

மாணவர்களே, நீங்கள் கற்க வேண்டிய பாடங்களை ஆழமாகவும் வேகமாகவும் கற்க வேண்டும். ஒரு சார்பு அறிவு என்று இல்லாமல் எல்லாவற்றையும் கற்றுத் தேற வேண்டும் என்பது குருதேவர் ஸ்ரீராமகிருஷ்ணரின் மாணவர்களுக்கான அறிவுரை.

கேள்வி: ஒருவரது கவனச்சிதைவினால் (Distraction of Mind) என்ன நடக்கிறது?

பதில்: ஒருவன் சாப்பிட அமர்கிறான். சாப்பிடும்போது டிவி பார்க்கிறான். பார்த்தபடி செல்போன்.... பேசிக்கொண்டே படுக்கிறான். படுத்தபடி சாப்பிடுவதைப் புறக்கணிக்கிறான். அவன் பாதி சாப்பிட்ட எச்சில் உணவு வீணாகிறது.

ஏன் செய்கிறோம்? எதற்காகச் செய்கிறோம்? எப்படிச் செய்ய வேண்டும் என்ற லட்சியம் இல்லாமல் அவன் தனது வேலைகளைத் தண்டமாகச் செய்கிறான். அதனால் அலட்சியம் அவனைத் தொற்றிக் கொள்கிறது. கவனச்சிதைவு எவ்வளவு விஷயங்களை உருவாக்குகிறது என்று கவனி.

மேலே சொன்ன எந்தக் காரியத்தையும் அவன் உருப்படியாகச் செய்யவில்லை. வேஸ்டானது சாப்பாடு மட்டுமல்ல, அவன் நேரமும் வாழ்வும்தான்.

கேள்வி: எனக்கு மனஒருமைப்பாடு இருக்கிறது; கவனச்சிதைவு எனக்கில்லை என்று நானே எவ்வாறு கண்டுபிடிப்பது?

பதில்: மிகவும் சுலபம். தூக்கம் இல்லாத ஒருவன் உன் பக்கத்தில் அமர்ந்து கொட்டாவி விட்டால்..... அதைப் பார்த்து நீயும் அவனுடன் சேர்ந்து விட்டால்.... கவனச்சிதைவு உன்னைக் கவ்விக் கொள்ளத் தயார் என்று அறி.

கேள்வி: எனக்கு இரவில் நிறைய சம்பந்தமற்ற கனவுகள் வருகின்றன. காலையில் எழும்போது மனதில் குழப்பங்கள் நிறைய இருக்கின்றன. இதற்கு என்ன காரணம்?

பதில்: ஒரு வார காலம் இரவில் அதிக நேரம் செல்போனில் பார்க்காதே, கேட்காதே, பேசாதே. நல்ல தூக்கம் உனக்கு வரும். விழித்ததும் ஊக்கம் உனக்காகக் காத்திருக்கும்.

கேள்வி: மனிதன் செய்யும் பாவங்களில் அவனையே அழித்துவிடக்கூடிய பாவம் எது?

பதில்: அகம்பாவம்தான். நான் நான் என்று மார்தட்டிக் கொண்டு சொந்த வாழ்க்கையை மயானமாக்கிக் கொள்ளச் செய்வது இந்த பாவம்தான்.

சுவாமி விமூர்த்தானந்தர்

ஸ்ரீராமகிருஷ்ண விஜயம்

ஏப்ரல், 2023

தொடரும் ஸ்ரீராமகிருஷ்ண அருளிச் செயல்கள்

Mon, 27 Feb 2023 13:00:34 +0530

ஸ்ரீராமகிருஷ்ண விஜயம் மார்ச், 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in March, 2023.

எம்பெருமானே, நீங்கள் உலக நன்மைக்காகவே வந்தீர்கள். சில நாட்கள் ஆனந்தக் கடலில் மக்களை ஆழ்த்தினீர்கள். திடீரென மறைந்து விட்டீர்கள். அதனுடன் எல்லாம் முடிந்துவிட வேண்டியதுதானா....?

அன்னை ஸ்ரீசாரதாதேவியின் இந்தப் பிரார்த்தனையின் பலனாக, ஸ்ரீராமகிருஷ்ணர் தொடர்ந்து நமக்கு அருளி வருவதை நாம் அனுபவிக்கிறோம்.

சென்னை, ஸ்ரீராமகிருஷ்ண மடத்தில் சசி மகராஜுக்கு ஸ்ரீராமகிருஷ்ணர் அருளியதெல்லாம் அதிசயமானது. சிவபெருமான் நாயன்மார்களுக்கு அருளிய விதம், ஸ்ரீமந் நாராயணன் ஆழ்வார்களுக்கு அனுக்கிரஹித்த விதம் போன்றவை அவை.

ஒரு முறை குருதேவரின் ஜயந்தியன்று 5000 பேருக்கு அன்னதானம் வழங்க வேண்டும் என்று சசி மகராஜ் இறைவனிடம் வேண்டினார். ஆனால் முதல் நாள் சமையலுக்கான ஒரு பொருள்கூட இல்லை. ஆனால் திடீரென்று ஒரு பக்தர் அன்னதானத்திற்கான அனைத்துப் பொருட்களையும் கொண்டு வந்த நிகழ்ச்சி..... ஸ்ரீராமகிருஷ்ணர் நிகழ்த்திய இவை போன்ற பல அற்புதங்கள் பக்தர்கள் அறிந்ததே.

ஸ்ரீராமகிருஷ்ணரின் அருளிச்செயல்கள் அந்தக் காலத்திற்கு மட்டுமல்ல, இன்றும் அவை அமைதியாகத் தொடர்கின்றன.

முப்பத்து முக்கோடி தேவர்கள் அருளினர்.

சென்னை, ஸ்ரீராமகிருஷ்ண மடம் ஒரு நூற்றாண்டிற்கும் மேலாகப் பல்வேறு சமுதாய மற்றும் சமயப் பணிகளையும், பேரிடர் காலச் சேவைகளையும் செய்து வருகிறது. வளர்ச்சியில் தொய்வு என்பதும் ஒரு தேவைதானோ!

மடத்தில் 2012-13 -ஆம் வருடங்களில் சில கட்டடப் பணிகளும் விரிவாக்கப் பணிகளும் நடந்தன. சுவாமி விவேகானந்தரின் 150-வது ஆண்டு விழா பெரிய அளவில் கொண்டாடப்பட்டது..... போதிய நிதி திரட்டப்படாமல்!

இன்னும் சில காரணங்களால் மடத்திற்கு நிதி நெருக்கடி ஏற்பட்டது. அந்த நெருக்கடியில் இருந்து மீண்டு வர மடத்துத் துறவிகள் சிலர் நிதி ஆதாரங்களைப் பலப்படுத்துவதில் மும்முரமாக ஈடுபட்டிருந்தார்கள். மடத்தின் தலைவர் தவத்திரு சுவாமி கௌதமானந்த மகராஜ் அனுதினமும் குருதேவரை வேண்டி வந்தார்.

கருணைக்கடலான குருதேவரின் அருள் வரவே செய்தது, அதுவும் கல்பதரு தினத்தில்!

அது 2016 -ஆம் ஆண்டு. கீழ்ப்பாக்கத்தில் இருந்த திருமதி ராஜம் ஸ்ரீனிவாசன் அவர்கள் தனது சொத்துக்களை மடத்திற்கு எழுதி வைத்தார். அவர் எழுதிய கையெழுத்துப் பிரதியை அவரது உறவினர் ஒருவர் கல்பதரு தினத்தன்று கொண்டு வந்து தலைவர் சுவாமிகளிடம் வழங்கினார்.

அந்தச் சொத்தினை மடத்தின் பணிக்காகவும் வளர்ச்சிக்காகவும் பயன்படுத்துவது என்று முடிவெடுக்கப்பட்டது. அதன்படி, அந்தச் சொத்திற்கு உரிமை கோருபவர்கள் யாராவது இருக்கிறார்களா என்பதற்காக நோட்டீஸ் விடப்பட்டது. அந்தச் சொத்தில் தங்களுக்கும் பங்குண்டு என்று கூறி யாரும் வராதது ஆச்சரியமே!

மடத்தின் பணப்பரிவர்த்தனை வெள்ளையாகவும் நேரடியாகவும் இருப்பதால் பலரும் அந்தச் சொத்தை வாங்க வரவில்லை.

முடிவில், ஒரு நிறுவனம் அந்தச் சொத்தினை வாங்கியது. முப்பத்து முக்கோடி தேவர்களும் சென்னை மடத்தை ஆசிர்வதித்தது போலிருந்தது அந்த நிகழ்வு.

இந்தப் பரிவர்த்தனையில் ஓரிடத்திலும் எந்த ஒரு தடங்கலும் இல்லை. இந்த அருளிச் செயலை அவதானித்த மடத்தின் முன்னாள் மேலாளரான சுவாமி அபிராமானந்தர் இவ்வாறு குறிப்பிட்டார்:

ஸ்ரீராமகிருஷ்ணரின் இந்தப் பேரருளுக்கு மூன்று காரணங்கள் உள்ளன. 1. ஸ்ரீராமகிருஷ்ணரின் பரம கருணை, 2. தவத்திரு சுவாமி கௌதமானந்த மகராஜின் பிரார்த்தனை, 3. அன்றைய மேலாளரின் கடும் உழைப்பு.

கோவிலின்புனரமைப்பு

மடத்தின் பழைய கோவில் 115 வருடத்துப் பாரம்பரியம் மிக்கது. பல துறவிகளுக்கு குருதேவர் காட்சி தந்ததும், எத்தனையோ பக்தர்களுக்கு குருமார்கள் தீக்ஷை வழங்கியதும் இங்குதான்.

2015 -இல், நூறு வருடத்து மரத்தாலான பீம்கள் பலவீனமாகிவிட்டிருந்தன. மொத்த பீம்களையும் எடுத்துச் சீரமைக்க பல லட்சங்கள் செலவாகும் என்று கணக்கிடப்பட்டது. ஏற்கனவே மடத்தின் நிதி ஆதாரம் சிரமத்தில் இருந்ததால், இந்தப் பெரிய நிதியை எவ்வாறு திரட்டுவது என்பதை யோசித்து மேலாளர் திணறினார்.

நிதிக்காக வேண்டுகோள் விடுத்து அப்பீல் தயாரானது. அதன் ப்ரூப் மேலாளரின் மேஜைக்கு வந்தது. அப்போது மடத்திற்கு நன்கொடை வழங்க இருவர் வந்தனர். அவர்களை மேலாளர் வரவேற்றார். அதற்குள் அவருக்கு ஓர் அலைபேசி வரவே நன்கொடை ப்ரூப்பை மேலாளர் வந்தவரிடம் படித்துப் பார்க்குமாறு கூறினார்.

மேலாளர் அலைபேசியில் பேசி முடித்ததும், வந்த அன்பர் அமைதியாக, சுவாமிஜி, கோவில் புனரமைப்பிற்கான மொத்த நிதியையும் நானே வழங்குகிறேன் என்று கூறி வயிற்றில் பாலை வார்த்தார். மேலாளரின் நெஞ்சு விம்மியது. ஸ்ரீராமகிருஷ்ணா சரணம்.... சரணம்!

அடுத்த நான்கு மாதங்களில் பழைய கோவில் புனரமைக்கப்பட்டது.

சென்னை மடத்தின் மேலாளராக (2014 -2020) ஆறு ஆண்டுகள் சேவை செய்யும் வாய்ப்பு அடியேனுக்குக் கிடைத்தது. அதற்கு முன்பு ஸ்ரீராமகிருஷ்ண விஜயத்தின் ஆசிரியராக 15 ஆண்டு காலம் (2001-2015) சேவையாற்றும் பாக்கியத்தையும் பகவான் வழங்கினார்.

பத்திரிகைத் துறை முன் அனுபவமும், அதற்கான படிப்பும் இல்லாத அடியேனைக் கொண்டு ஸ்ரீராமகிருஷ்ணர், ஸ்ரீராமகிருஷ்ண விஜயத்தை சுமார் 2 லட்சம் பிரதிகள் சர்குலேஷனுக்கு உயர்த்திக் காண்பித்தார்.

2001 -ஆம் ஆண்டு. மகான் போதேந்திராளின் படக்கதை ஒன்றைத் தயார் செய்து ஓவியருக்கு அனுப்பினேன். போதேந்திராளின் திருவுருவப் படத்தை ஓவியருக்கு அனுப்ப வேண்டும்.

இணையதள வசதி இல்லாத காலத்தில் போதேந்திராளின் படம் கிடைக்கவில்லை. பிறகு என்ன?

பிரயத்தனம் பிரார்த்தனையானது. ஒரு நாள் கோவிந்தபுரத்து மடத்திலிருந்து ஒரு கவர் வந்தது. அதில் விபூதி, குங்கும பிரசாதங்கள், மங்கள அட்சதை, போதேந்திராளின் இரண்டு திருவுருவப்படங்கள் இருந்தன.

அனுப்பியது யாராக இருக்கும்? குருதேவா, குருதேவா என்று மனம் கொண்டாடியது.

லட்சத்தைக்கடந்தலட்சியப்பத்திரிகை

2007 -ஆம் ஆண்டு விஜயத்தின் வரலாற்றில் ஒரு மைல்கல். ஆம், தமிழகத்தில் ஓர் ஆன்மிகப் பத்திரிகை லட்சம் பிரதிகளைக் கடந்து விற்பனையாகிறது என்பதே வியப்பல்லவா! ஆகஸ்ட், 22 -ஆம் தேதி அந்த வெற்றியைப் பதிவு செய்ய விழா ஒன்று எடுக்கப்பட்டது. லட்சத்தைக் கடந்த லட்சியப் பத்திரிகை என்ற சிறப்பு மலரும் வெளியிடப்பட்டது.

அதற்கு முந்தைய மாதம் வரை 96 ஆயிரம் பிரதிகள் மட்டுமே விற்பனையாகி வந்தன. ஆகஸ்ட் மாதம் பல ஏஜென்ட்டுகள் அவர்கள் வாங்கும் விஜயம் பிரதிகளை அதிகரிப்பதாகக் கூறியிருந்தனர். அதை நம்பி விழாவிற்கு ஏற்பாடு செய்தோம். ஆனால் அவர்கள் சொன்னபடி நடந்து கொள்ளவில்லை.

சர்குலேஷனை உயர்த்தப் போராடிக் கொண்டே பத்திரிகை விழாவை நடத்துவதற்கும் பகீரதப் பிரயத்தனம் பட வேண்டி இருந்தது.

சிறப்பு மலருக்கான கட்டுரைகளைச் சேகரிப்பது, விளம்பரங்கள் வாங்குவது, மலருக்கான கூடுதல் செலவினங்கள், பத்தாயிரம் பேர் கலந்து கொள்ளும் அரங்க ஏற்பாடு போன்ற பல பணிகளுக்கு நடுவே திக்குமுக்காடிக் கொண்டிருந்த நேரம்.

விஜயம் லட்சம் பிரதிகளைக் கடக்காதபோது கடந்துவிட்டது என்று கூறிப் போலியான விழாவாகப் போய்விடுமோ என்ற அச்சம் என்னைக் கவ்வியிருந்தது. இறைவா, இந்த விழா உன் மகிமையைக் கூறத்தான் என்று இதயம் ஏங்கி ஏங்கித் துடித்தது.

ஒரு நாள் சர்குலேஷன் அலுவலக ஊழியர், முன்பின் தெரியாத பலர் நிறைய பிரதிகளை வாங்குவதாகப் பணம் செலுத்தியதைக் கூறினார்.... அது ஸ்ரீராமகிருஷ்ண அருளிச் செயல்தானே!

ஒரு லட்சத்து 400 பிரதிகளாக அந்த மலர் வெளியானது வெற்றி விழா அல்ல, ஸ்ரீராமகிருஷ்ணரின் மகிமை வெளிப்பட்ட விழா அது.

அப்போதும் ஓர் அதிர்ச்சி. விழா சென்னையில் லேடி வெலிங்டன் மைதானத்தில் நடைபெற்றது. விழாவிற்கு இரண்டு நாள் முதல் கடும் மழை.

அருமை நண்பர் திரு தென்கச்சி சுவாமிநாதன் தொலைபேசியில் என்னை அழைத்தார். சாமி, இந்த மழையில் நாளை நிகழ்ச்சி இருக்குமா? என்று கேட்டார். அதற்கு நான் அமைதியாக, நாளை மழை வராது என்ற நம்பிக்கை; மழை வர வேண்டாம் என்பது பிரார்த்தனை என்றேன்.

ஆகஸ்ட் 22. காலை 4.30 மணிக்கு ஓர் இளம் துறவி என்னிடம், இந்த மழையில் என்ன செய்யப் போகிறோம், மகராஜ்? என்றார். நாம் நமது பணியைச் செய்வோம்; குருதேவர் அவரது பணியைச் செய்வார் என்றேன் பிரார்த்தனையுடன்.

அன்று காலையில் உள்ளும் புறமும் ஒரே மேகமூட்டம். எல்லாக் கவலைகளையும் குருதேவரிடம் விட்டுவிட்டு குருதேவருக்குக் கோவிலில் நித்திய பூஜை செய்யச் சென்றேன்.

பிற்பகல் 2.30 வரை மழை தொடர்ந்தது. மூன்று மணிக்கு மெல்ல மெல்ல வானம் பளிச் சிட்டது. ஆஹா, ஐந்து மணிக்கு மேடையில் குருதேவருக்கு ஆரதி நடத்தப்பட்டதும் விழா மேடையில் வெயில் அடித்தது ஒரு பரவச அனுபவம்.

தமிழகத்தின் பத்திரிகைத் துறையில் பலராலும் பாராட்டப் பெற்ற ஒரு நிகழ்வு அது. அன்றைய முதல்வர் திரு மு.கருணாநிதி அவர்கள் நிகழ்ச்சிக்கு வாழ்த்துரை வழங்கி இருந்தார். விஜயத்திற்குக் கிடைத்த செல்வாக்கினால் பலரும் ஆன்மிகப் பத்திரிகைகளை ஆரம்பித்தார்கள். குறிப்பாக, குமுதம் பத்திரிகை பக்தி ஸ்பெஷலையும், விகடன் பத்திரிகை சக்தி விகடனையும் கொண்டு வந்தன.

பிறகு விழா பற்றிய வரவு - செலவுக் கணக்கு சரி பார்க்கப்பட்டது. இரண்டு லட்சத்து 60 ஆயிரம் ரூபாய் செலவு அதிகமாகி இருந்தது.

அன்று ஒரு நாள் ஈரோட்டிலிருந்து ஓர் அன்பர் ஒரு மஞ்சள் பையுடன் விஜயம் அலுவலகத்திற்கு வந்தார். விழா பற்றியும், வரவு செலவு பற்றியும்கூட அவரிடம் கூறிக் கொண்டிருந்தோம்.

உடனே அவர் கண்கள் பனிக்க மகிழ்ச்சியாகக் கூவினார்: இப்போதான் புரியுது மகராஜ். இதனாலதான் ஸ்ரீராமகிருஷ்ணர் எனக்கு இன்செண்டிவாக இவ்வளவு அதிக பணத்தைக் கொடுத்திருக்கிறார்..... அது அவரது சேவைக்கே பயன்படட்டும் என்று கூறிப் பணக்கட்டுகளை மேஜையின் மீது வைத்தார்.

அந்தத் தொகையினை எண்ணிப் பார்த்தபோதுதான் அருளிச்செயலின் ஓர் உச்சம் தெரிந்தது. ஆம், 2 லட்சத்து 60 ஆயிரம் ரூபாயை அந்தப் பக்தர் மூலமாக வழங்கியது வேறு யாராக இருக்க முடியும்!

நமது பக்தியை அதிகப்படுத்திக் கொண்டால் குருதேவரது அருளை அதிகமாக உணரலாம்.

மேற்கூறிய நிகழ்வுகள் யாவும் பகவான் ஸ்ரீராமகிருஷ்ணரின் அருளிச் செயல்களாக இங்கு பதிவு செய்யப்படுகின்றன, அதிசயச் செயல்களாக அல்ல!

சுவாமி விமூர்த்தானந்தர்

ஸ்ரீராமகிருஷ்ண விஜயம்

மார்ச், 2023

சோஷியல் மீடியா கவர்ச்சியிலிருந்து நாம் தப்புவது எப்படி?

Thu, 02 Feb 2023 15:38:35 +0530

ஸ்ரீராமகிருஷ்ண விஜயம் பிப்ரவரி, 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

The Article by Swami Vimurtananda appeared in Sri Ramakrishna Vijayam in February, 2023.

கேள்வி: மாணவ மாணவிகளை சோஷியல் மீடியா மிகவும் கவர்கிறது. ஆனால் பள்ளி மற்றும் கல்லூரிப் பாடங்கள் மாணவர்களைச் சுத்தமாக ஈர்ப்பதில்லை, ஏன்? -ஆசிரியர் வேலப்பன், அரசுப் பள்ளி, சேலம்

பதில்: சோஷியல் மீடியாவில் ஒரே நேரத்தில் பலவிதமான ரசனைகள் மனிதனுக்குக் கிடைக்கின்றன. கண்ணை ஈர்க்கும் கலர் கலரான காட்சிகள்; காதை இழுக்கும் பலவித இசைகள்; கருத்தை ஈர்க்கும் விதவிதமான செய்திகள், சிந்தனைகள், கதைகள்; குறைவான நேரத்தில் இளம் மனங்களைக் கொள்ளையடிக்கும் அம்சங்கள் அதில் நிறைந்துள்ளன. தான் அனுபவித்ததைப் பிறருடன் சொல்லிக் கொள்வதற்கும் மாணவன் பெருமைப் படுகிறான்.

மாணவர்களின் கண், காது, தொடுவது போன்ற எல்லா இந்திரியங்களையும் சோஷியல் மீடியா இழுக்கின்றன. மாணவனைக் கவரும் மேற்கூறிய எல்லா அம்சங்களும் ஆசிரியர்களால் செய்ய முடிவதில்லை.

ஆனாலும் சில ஆசிரியர்கள் ஸ்மார்ட் கிளாஸ், பி.பி.டி. பிரசன்டேஷன், வீடியோ செஷன், ஆன்லைன் டீச்சிங், வாட்ஸ் அப் குழு மூலம் கற்பிப்பது போன்ற பல வகையிலும் மாணவர்களை ஈர்ப்பதற்காக உழைப்பதையும் காணலாம். தொழில்நுட்பம் தெரிந்த மாணவ- மாணவிகளைத் தங்களது கற்பித்தலில் ஆசிரியர்கள் சேர்த்துக்கொண்டால் ஆசிரியர்களின் வேலைப் பளு குறையும்.

இன்று ஆசிரியர்களுக்கும் மாணவர்களுக்கும் இடையே ஒரு வெற்றிட உணர்ச்சியற்ற இடைவெளி தெரிகிறது. நமது சமயப் பண்பாடு கூறிய குரு - சிஷ்ய உறவுமுறையில் இருந்த பரஸ்பர நம்பிக்கை மற்றும் முன்னேற்றத்தில் ஈடுபாடு போன்றவை குறைந்து விட்டன.

இன்று பல சட்ட திட்டங்கள் ஆசிரியர்களின் கைகளைக் கட்டி வைத்துள்ளன. கண்களை மூடிக் கொள்ளச் சொல்கின்றன. கண்டிப்பு கூடாது என்று கூறிவிட்டதால் கனிவும் ஏற்படாமல் போய்விடுகிறது. ஆசிரியர்களை மதிக்க வேண்டும் என்ற உணர்வு சமுதாயத்தில் குறைந்து வருகிறது. அதன் தாக்கம்தான் இன்றைய மாணவர்களின் பாராமுகம்.

அதற்காக இந்தப் பிரச்னையைக் கவனிக்காமல் விட்டுவிட முடியாது. மாணவனிடத்தில் உள்ள எதைக் கவர்ந்தால் அவனைக் கவர முடியும் என்று சிறந்த ஆசிரியர்கள் யோசிப்பார்கள்.

பணத்துக்காக மட்டுமே பணி செய்யும் ஆசிரியர்கள் சாமானியர்களாக அதிக அளவில் இருந்து விட்டுப் போகட்டும்.

ஆனால் கல்வியையும் மாணவர்களையும் சமுதாயத்தையும் நேசிக்கும் ஆசிரியர்கள் இந்த நிலைமையை இப்படியே விட்டுவிட முடியாது. இதனை வாசிக்கும் நீங்கள் அப்படிப்பட்ட ஆசிரியர் என்பதால் ஒரு வேண்டுகோளாக உங்களிடம் சிலவற்றைக் கூறுகிறோம்.

எதுவெல்லாம் உங்களை அமுக்குகிறதோ, அதை மீறி நீங்கள் மேலே வருவதே ஒரு யோகமாகும். அதுதான் நீங்கள் பார்க்கும் உத்தியோகம். அந்த யோகத்தில் நீங்கள் வளர வேண்டாமா? வெளி பலத்தை விட மனிதனின் மனோபலம் வலுவானது.

தடைகள், சங்கடங்கள், புறக்கணிப்புகள் போன்றவற்றை மீறி ஆசிரியர்கள் மாணவனின் நலத்தை நாடினால்...,

நான் மாணவனின் நலம்விரும்பி, என்பதை ஆசிரியர்கள் மாணவர்களுக்குப் புரிய வைத்தால்...,

அதற்காக ஆசிரியர்கள் லட்சியதாகமும் சேவை வீரியமும் கொண்டு செயல்பட முடிந்தால்...,

சோஷியல் மீடியா தரும் அற்ப சுகங்கள் எல்லாம் சொற்ப காலத்திற்கே என்பதை ஆசிரியர்கள் நம்ப முடிந்தால்..., அதனை மாணவர்களுக்கு உணர்த்த முடிந்தால்...,

ஆசிரியர்கள், தங்கள் மனதின் ஆற்றலைப் பயன்படுத்தி ஈடுபாட்டு மற்றும் அர்ப்பணிப்பு உணர்வினால் மாணவர்களின் மனங்களைப் பிடிக்கக் கற்றுக்கொண்டால்...,

மாணவனின் கவனத்தை ஈர்க்க முடியும் என்பது நல்லாசிரியர்களின் அனுபவம். அவ்வாறு செய்ய முடிந்தால் மீடியாக்கள் காட்டுவதைவிட அதிகமான ஈர்ப்பினை மாணவன் ஆசிரியரிடமிருந்து பெறுவான்.

அப்படிப்பட்ட ஆசிரியர்கள் பலர் இன்றும் உள்ளனர். அது போன்ற சில நல்லாசிரியர்களை நம்பித்தான் நம் சமுதாயம் இருக்கிறது. அந்த ஆசிரியர்களுள் ஒரு முத்தாக நீங்கள் வளர வேண்டும் என்பதே நமது பிரார்த்தனை.

கேள்வி: சோஷியல் மீடியா மூலம் பலவற்றைக் கற்க முடியும்போது பள்ளிப் பாடங்கள் தேவையா? மாணவி பரிமளா சற்குணம், திருப்பூர்.

பதில்: தங்கையே, ஐஸ்கிரீம் பிடிக்கும் என்பதற்காக அதையே ஆயுள் முழுதும் உண்ண முடியுமா? ஐஸ்கிரீம்களில் பல நச்சுப் பொருட்கள் toxins உள்ளன என்பது உனக்குத் தெரியாது என்று நினைக்கிறேன். சோஷியல் மீடியாவில் சுறுசுறுப்பாக இருப்பவன், சிறிது காலத்தில் பரபரப்பாகி மன உளைச்சலுக்கு ஆளாகி மருந்து சாப்பிடுவதை நீ பார்த்ததில்லையா?

உலகிலுள்ள எல்லாவற்றையும் சோஷியல் மீடியா உனக்குக் காட்டலாம். ஆனால் உன்னை உனக்கு அது காட்டாது. உன் திறமை என்ன? உன் பொறுப்பு என்ன? எதிர்காலத்தில் எப்படி வாழ்வது போன்ற உனது அடிப்படைக் கேள்விகளுக்கு நீதான் பதில் காண வேண்டும். அதற்காகப் பள்ளிப் பாடங்களைப் படி.

பாடங்கள் உன்னைக் கவரவில்லை என்பதற்காக உன்னை ஒரு மெஷினாக்கும் ஒன்றினால் நீ கவரப்படுவது சரியா? யோசி தங்கையே.

அமுல் பால் கிட்டாவிட்டால் ஆல்கஹாலின் பால் செல்வதை அறிவுள்ளவன் செய்வானா? சோஷியல் மீடியாவில் மூழ்கி Mediocre -சராசரி மனிதனாக மாறிவிடாதே. ஐஸ்கிரீம் போன்ற junk foodகளை அளவுடன் நிறுத்து. சோஷியல் மீடியா அதிக வம்பைத் தரும். உன் மன ஆரோக்கியத்தைக் கெடுக்கும்.

ஆனால் கல்விப்பாடம் என்பது உன் அம்மாவின் சமையல் போன்றது என்பதை மறவாதே. அது அன்பைத் தரும். ஆரோக்கியத்தை உருவாக்கும்.

கேள்வி: மாணவர்களுக்கு தியானப் பயிற்சி தேவையா? - மாணவன் ரஞ்சித், எண்ணூர், சென்னை.

நீ ஒரு முக்கியமான வேலையைச் செய்கிறாய். அதில் முழுவதுமாக கவனத்துடன் ஈடுபட்டிருக்கிறாய். அப்போது யார் உன்னைத் தொந்தரவு செய்தாலும் உன்னை அசைத்துக் கொள்ள முடியாது. இது போன்ற ஒரு மனநிலையை தியானப் பயிற்சி உனக்கு வழங்குகிறது.

உடல் நோயின்றி ஆரோக்கியமாக இருக்க மூச்சுப் பயிற்சி தேவை. சுவாசம் முறையாக இருந்தால் மனதின் ஆற்றல் அதிகரிக்கும்.

வீட்டில் உன் அப்பாவும் அம்மாவும் ஒற்றுமையுடன் இருந்தால்தான் நீ நன்றாக இருப்பாய், அல்லவா? அதுபோல் உனது உடலுக்கும் மனதிற்கும் உள்ள இணக்கமான உறவை உனக்குள் தருவது தியானப் பயிற்சி.

தம்பி, நீ வெளியில் இருந்து வரும் சத்தங்கள், பிறர் செய்யும் தொந்தரவுகள் போன்றவற்றில் இருந்து கவனச்சிதைவு இன்றி படிக்க வேண்டுமா?

ஆர்வத்துடனும் உயர்நோக்கத்துடனும் புத்தகங்களைப் படிக்க வேண்டுமா?

படித்தது நினைவில் இருக்க வேண்டுமா?

நினைவில் உள்ளதைத் தேர்வில் வேகமாக நீ எழுத வேண்டுமா?

நல்ல மதிப்பெண்கள் பெற வேண்டுமா?

வாழ்க்கையில் எதையாவது சாதிக்க வேண்டும் என்ற தாகத்துடன் நீ படிக்க வேண்டுமா?

இவையெல்லாம் மாணவனுக்கு வேண்டும் என்றால் தியானப் பயிற்சியும் அவனுக்கு வேண்டும்.

கேள்வி: எனது மனம் எங்கு உள்ளது என்பதைக் கண்டுபிடிப்பது எப்படி? -மாணவி விஷாலினி, பிளஸ் 2, திருநெல்வேலி.

பதில்: உனது ஆர்வமும் கவனமும் உள்ள இடத்தில் உனது மனமும் உள்ளது.

கேள்வி: இப்போதெல்லாம் எனக்குப் படிப்பதில் மட்டுமல்ல, எதிலும் கவனம் செல்வதில்லை. காரணம் என்ன? மாணவன் வின்சென்ட், பெரம்பலூர்.

பதில்: வகுப்பில் உட்கார்ந்து படிக்கப் பிடிக்காத பல மாணவர்களுக்கு ஸ்டேடியத்தில் கிரிக்கெட் பார்ப்பதற்கு மட்டும் எப்படி ஆர்வம் வருகிறது?

இரண்டு இடத்திலும் உட்கார்பவன் ஒருவன்தான். கிரிக்கெட்டில் ஆர்வத்தை அவனாக வளர்த்துக் கொண்டான். படிப்பதிலும் அந்த ஆர்வத்தை அவன் ஏன் வளர்த்துக் கொள்ள முடியாது?

உனது கவனம் ஓரிடத்தில் குறைந்தால் அது வேறு இடத்தில் எங்கோ இருக்கிறது என்று புரிந்து கொள். படிப்பதில் உனக்கு ஆர்வம் குறைகிறது என்றால் வேறு ஏதோ ஒன்றைப் பார்ப்பதிலும், அதனுடன் பழகுவதிலும் உனது ஆர்வம் கூடி இருக்கிறது என்று அர்த்தம்.

அது உனது கையைக் கைதாக்கி இருக்கும் செல்போனாக இருக்கலாம். உன் கழுத்தைக் கவ்வியிருக்கும் பேஸ்புக் ஆக இருக்கலாம்.

எவையெவை உனது கவனத்தைச் சிதைக்கின்றன என்பதைக் கண்டுபிடி; அதை மட்டும் நீ செய்தால் நல்லவர்கள் உன்னைத் தேடி வந்து கண்டுபிடித்துப் பாராட்டுவார்கள்.

சுவாமி விமூர்த்தானந்தர்

ஸ்ரீராமகிருஷ்ண விஜயம்

பிப்ரவரி, 2023

பிரச்னைகளுக்கு நிரந்தர தீர்வு வேண்டுமா?

Thu, 05 Jan 2023 16:37:30 +0530

ஸ்ரீராமகிருஷ்ண விஜயம் ஜனவரி, 2023 மாத இதழில் வெளிவந்த சுவாமி விமூர்த்தானந்தர் எழுதிய கட்டுரை.

Article by Swami Vimurtananda appeared in Sri Ramakrishna Vijayam in January, 2023.

சனாதனமான இந்து தர்மத்தில் குருவிடம் சீடன் தன் சந்தேகங்களைக் கேட்பான். அதற்கு குரு நேரடியாக எளிமையாகக் கூறுவதும் உண்டு. பல சமயங்களில் சீடனை முதலில் உணர்வு ரீதியாக, ஆழமாகச் சிந்திக்க வைத்துப் பதிலைச் சீடனே உணரும்படி செய்யும் குருமார்களும் உண்டு.

பரம்பொருளைப் பற்றிய அருளாளர்களின் உபதேசங்கள் மறைபொருளாக இருக்கும். சீடனுக்கான பதிலை கூடார்த்தமாகக் குருமார்கள் கூறுவார்கள்.

குழந்தை பசிக்கிறது என்றால் உடனே தின்பண்டங்களைத் தரச் சொல்லும் நமது காலத்துக் கல்வி அல்ல அது. மாறாக, பசியை அதிகரித்த பின் சத்தான உணவைப் பரிமாறும் பரிவுடையவர்களே சனாதன குருமார்கள். மகான்கள் உடலின் வெளிப்புறச் சேஷ்டைகளைக் காணாமல், உயிரின் உயர்நோக்கு யாத்திரையைத் துரிதப்படுத்துவார்கள்.

போர்க்களத்தில் அர்ஜுனன் தாத்தாவையும் குருவையும் அண்ணன் தம்பிகளையும் எப்படிக் கொல்வது என்று குழம்பினான். அந்தக் குழப்பத்திற்குத் தீர்வாக ஸ்ரீ கிருஷ்ணர், ‘‘இது தர்மத்தை நிலை நாட்டும் தர்மயுத்தம். நீ உறவினர்களுடன் போராடவில்லை; அதர்மத்தை முறியடிக்கப் போராடுகிறாய் என்று விளக்கம் கூறி அர்ஜுனனைத் தெளிவித்தார்.

அதாவது சீடனின் கவனத்தை மேம்படுத்தி உயர்ந்த நோக்கத்தைக் காண்பித்துத் தருவது சனாதன குருமார்களின் சீரிய பண்புகளுள் ஒன்று.

‘நோய்நாடி நோய்முதல் நாடி அதுதணிக்கும்

வாய்நாடி வாய்ப்பச் செயல் என்கிறது திருக்குறள்.

நோயின் தன்மை, நோய் வந்ததற்கான அடிப்படைக் காரணம், நோயாளியின் உடல் தகுதி போன்றவற்றைத் தெரிந்து கொண்ட பின்னரே சிறந்த மருத்துவர்கள் நோய்க்கு மருத்துவம் செய்வார்கள்.

கதைகளில் வரும் சில அரக்கர்களை ஒழிக்க ஏழு கடலைத் தாண்டி அங்கு ஒரு காட்டில் குறிப்பிட்ட மரத்தின் பொந்தில் வசிக்கும் ஒரு பறவையைப் பிடித்து நசுக்கிவிட்டால் அரக்கன் ஓய்ந்து விடுவான் என்று படித்திருக்கிறோம்.

சீடர்களைச்சோம்பேறிஆக்காதகுருமார்கள்!

அதுபோல், சனாதன குருமார்கள் பிரச்னைக்குத் தாற்காலிகமான தீர்வு சொல்வதில்லை. முதலில் பிரச்னையைப் பற்றிய தெளிவினைத் தருகிறார்கள். பிரச்னைகளின் அடியாழத்திற்குச் சென்று அதைச் சரி செய்வது உன்னத குருமார்களின் பணி.

சிறந்த குருமார்களின் உபதேசிக்கும் முறை என்பது வாயில் கொண்டு வந்து உணவூட்டும் முறையன்று. மீன் உண்ண ஆசைப்படுபவனுக்கு மீனைப் பிடிக்க கற்றுத் தருவதில் அவர்கள் அதிக கவனம் கொண்டிருந்தார்கள். மீனைச் சமைத்து வாயில் ஊட்டி, சீடர்களைச் சோம்பேறிகள் ஆக்குவதை அவர்கள் செய்வதில்லை.

சுவாமிவிவேகானந்தர்தமதுசீடர்

களுடன் மேலைநாட்டில் இருந்தார். ஒரு நாள் அவர் ஓர் ஓடையைத் தாண்டிப் போக வேண்டி இருந்தது. சீடர்களுள் வயதான ஒரு பெண்மணி இருந்தார். அவர் அந்த ஓடையைத் தாண்டுவதற்கு சுவாமிஜி உதவினார்.

அதே சமயம் இளம்பெண்ணான மற்றொரு சிஷ்யை சகோதரி கிறிஸ்டீன், தனக்கும் சுவாமிஜி அவ்வாறு உதவ வேண்டும் என்று எதிர்பார்த்தார். ஆனால் சுவாமிஜி அவரிடம், ‘‘உன்னால் இந்த ஓடையைத் தாண்ட முடியும். நீ தாண்டி வா என்று கூறிவிட்டார்.

உத்தமமான குருமார்கள் தங்களது சீடர்கள் தாங்களாகவே முன்னேறி, குருவை விஞ்சிய சீடர்களாக இருக்க வேண்டும் என்று ஆசைப்படுகிறார்கள்.

ஆதலால்தான் சாந்தோக்ய உபநிஷத்தில் குரு சீடனுக்கு ‘தத்துவமஸி - சீடனே, நீ அந்தப் பரம்பொருள் என்று உபதேசிப்பார். குரு கூறியதைக் கிளிப்பிள்ளை போல் சீடன் திருப்பிக் கூறாமல் ‘அஹம் பிரம்மாஸ்மி என்று உணர்வார். குருவின் உபதேசம் சத்தியத்தை உணர்த்தியது. விதை ஒன்று; முளை வேறு.

பலத்தினைப்பலவீனமாதுரத்துவது?

1888-ஆம் ஆண்டு. சுவாமி விவேகானந்தர் காசியில் இருந்த காலம். ஒரு நாள் அவர் துர்கா மந்திருக்குச் சென்று திரும்பிக் கொண்டிருந்தார். அவரிடம் சில பழங்கள் இருந்திருக்க வேண்டும். அதைக் கவனித்த ஒரு குரங்கு அவரைப் பின்தொடர்ந்தது. அடுத்து மெல்ல மெல்ல இன்னும் இரண்டு குரங்குகள் சேர்ந்து கொண்டன. சுவாமிஜி அவற்றைப் பொருட்படுத்தாமல் போய்க் கொண்டிருந்தார்.

சில நிமிடங்களில் ஒரு பெரிய குரங்குப் பட்டாளமே அவரைத் துரத்தியது. குரங்குப் படை துரத்தும்போது யார் தான் என்ன செய்ய முடியும்?

சுவாமிஜி ஓட ஆரம்பித்தார். குரங்குகள் அவரை ஓட்ட ஆரம்பித்தன. அப்போது எங்கிருந்தோ ஒரு துறவி அங்கு வந்தார். சுவாமிஜி ஓடுவதையும் குரங்குகள் துரத்துவதையும் கண்டார். உடனே அந்தத் துறவி, ‘‘நில், பலவீனத்தை எதிர்த்து நில்; அஞ்சாதே என்று கூவினார்.

சுவாமிஜி திரும்பிப் பார்த்தார். கையில் உள்ள தண்டத்துடன் குரங்குகளைப் பார்த்தார் தீர்க்கமாக; தெறித்து ஓடின அவையெல்லாம்.

‘இந்தச் சம்பவத்திலிருந்து நான் மிகப் பெரிய பாடத்தைக் கற்றேன் என்று சுவாமிஜி கூறினார்.

‘‘பலவீனத்திற்கான பரிகாரம் ஓயாது பலவீனத்தைப் பற்றியே சிந்தித்துக் கொண்டிருப்பதல்ல. மாறாக, பலத்தைச் சிந்தித்திடு என்றும் கூறியவர் அல்லவா சுவாமிஜி!

சுவாமிஜிக்குச் சரியான நேரத்தில், சரியான அறிவுரையை வழங்கிய அந்தத் துறவி யார் என்று தெரியாது. ஆனாலும் அவரது உபதேசம் மிகவும் முக்கியமானது. குரங்குகள் துரத்தியபோது சுவாமிஜியின் கையில் தண்டம் இருந்தது. ‘‘அதைக் கொண்டு குரங்குகளைத் தாக்குங்கள் என்று அந்தத் துறவி கூறவில்லை.

‘நான் பாதுகாப்பாக இருக்கும் இந்த இடத்திற்கு வந்து விடுங்கள் என்றும் அவர் கூறவில்லை.

‘உங்களிடம் இருக்கும் பழங்களைத் தூக்கி எறிந்து விடுங்கள், குரங்குகள் அதை எடுத்துக்கொண்டு உங்களை விட்டு விடும் என்றும் கூறவில்லை.

மாறாக, முற்றிலும் வித்தியாசமாக அந்தத் துறவி சுவாமிஜிக்கு உபதேசித்தார். ‘பலவீனத்தைக் கண்டு ஓடாதே; எதிர்த்து நில் என்று கூறியது ஆழ்ந்த பொருள் கொண்டது.

அந்த சனாதன துறவி குரங்குகளைப் பார்க்கவில்லை. பயந்து ஓடுபவரைக் காணவில்லை. அதைவிட நுணுக்கமாக ஒன்றைக் கவனித்தார். எதிலும் ஆழ்ந்த பார்வையைப் பார்க்கும் நுண்ணிய அறிவு கொண்டவரின் பார்வை அது.

கண்களால் காணும் கர்மங்களில், அகர்மத்தைப் பார்க்கும் திருஷ்டி அது. ஆற்றலின் ஊற்றான ஆன்மா, தேகத்தில் சிக்கித் தவிப்பது போன்ற ஒரு நிலையை அந்தத் துறவி கண்டாரோ!

சீதையை வனத்தில் இழந்த ராமர் கலங்கி நின்றார். பஞ்சபூதங்களில் சிக்கி, பிரம்மமே அழுகிறது என்று அதை ஒரு ரிஷி குறிப்பிட்டார். அந்த ரிஷியின் திருஷ்டியில் பிரம்மமும் தெரிகிறது; சம்சார வலையில் சிக்கித் தவிக்கும் ஓர் அவதாரபுருஷரின் அருமையும் புரிகிறது.

ஒரு பெரும் பலத்தைத் துரத்துவது பலவீனமா என்று கண்டு அதிசயித்தார்; அதற்கு ஏற்றபடி உபதேசித்தார்.

எண்ணிக்கை சிறிது என்று சோம்பியிருந்து விடாதே!

மேற்கூறிய குரங்கு துரத்திய நிகழ்விலிருந்து நாம் இன்னொரு பாடத்தையும் கற்க வேண்டும். ஒரு நாட்டில் எதிரிகள் - வந்தேறிகள்- ஒட்டுண்ணிகள் - தேசவிரோதிகள், நாட்டின் பாதுகாப்பிற்கு இடையூறாக மாறிவிடும் முன்பு அவர்களிடம் ஆரம்பத்திலேயே எச்சரிக்கையாக இருக்க வேண்டும்.

கையால் கிள்ளி எறியும் நிலை இருக்கும்போதே அதைச் செய்யாமல், கோடரியால் அதை வெட்டியெடுக்கும் தவறை மனிதன் செய்யக் கூடாது.

எண்ணிக்கை சிறியதுதானே என்று விட்டு விடாமல் அவர்களுடைய செயல்களைக் கண்காணிக்க வேண்டும். இல்லாவிட்டால் அவர்கள் சிறுகச் சிறுக வலுத்து ஒரு நாட்டையும் அதன் கலாச்சாரத்தையும் சமயத்தையும் ஏன், மக்களையும் சீரழித்து விடுவார்கள் என்ற ஒரு செய்தியும் இந்தக் குரங்குகள் சம்பவம் நமக்குக் காட்டுகிறது அல்லவா?

அதனால்தான் சனாதன குருமார்கள் ‘மனிதா, முதலில் உன்னைப் புரிந்து கொள்; உன் பிரச்னைகளைப் புரிந்து கொள். இரண்டையும் ஆழமாகப் புரிந்து கொள்ளும்போது உனது சீரிய சிந்தனையால், அந்த ஞானாக்னி என்ற தீயினில் பிரச்னைகள் தூசாகிவிடும் என்கின்றனர்.

உன் பிரச்னையைவிட நீ வலுவானவன் என்பது தானே எந்தப் பிரச்னைக்கும் நிரந்தர ஒரு தீர்வாக இருக்க முடியும்! அதைத்தான் சனாதன குருமார்களின் பரம்பரையில் வந்த சுவாமி விவேகானந்தரும் கூறினார். *

சுவாமி விமூர்த்தானந்தர்

ஸ்ரீராமகிருஷ்ண விஜயம்

ஜனவரி, 2023

பரீட்சை நெருங்குது; பயம் நெருக்குது!

Wed, 04 Jan 2023 19:54:49 +0530

ஸ்ரீராமகிருஷ்ண விஜயம் ஜனவரி, 2023 மாத இதழில் வெளிவந்த சுவாமி விமூர்த்தானந்தர் எழுதிய கேள்வி - பதில்கள்.

Q-A by Swami Vimurtananda appeared in Sri Ramakrishna Vijayam in January 2023.

சுவாமி விமூர்த்தானந்தர்

ஸ்ரீராமகிருஷ்ண விஜயம்

ஜனவரி, 2023